Қуръон олий мартабали ва серҳикмат Китобдир | Қуръони Карим дарслари (179-дарс)
Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.
Аллоҳ таоло Зухруф сурасида шундай марҳамат қилади:
«Очиқ-ойдин китоб ила қасам.
Албатта, Биз уни арабий Қуръон қилдик. Шоядки ақл юритсангиз. Албатта, у ҳузуримиздаги она китобдадир, батаҳқиқ олийдир, ҳикматлидир», деган (2-4-оятлар).
Яъни, «Ақл юритасиз, деган мақсадда очиқ-ойдин Китобни араб тилидаги Қуръон қилиб юбордик.
Аллоҳ таоло Ўзининг охирги Китоби учун араб тилини танлагани ва бу Китоб татбиғи учун араб Пайғамбар ва араб халқини танлаганининг сабаблари аввал айтиб ўтилди.
Албатта, бу оятлар араблар учун шараф бўлиши билан бирга, уларнинг зиммасига жуда улкан масъулият ҳам юклайди, Қуръонга, Исломга хизмат қилишдек катта масъулиятни қўяди. Араблар ақлларини ишлатиб, ўзларига юклатилган буюк вазифани тушуниб етишлари ва унга лойиқ хизмат қилишлари лозим бўлади.
«Албатта, у ҳузуримиздаги она китобдадир, батаҳқиқ олийдир, ҳикматлидир».
Ушбу оятда Қуръони Карим Аллоҳ таоло наздида қанчалик юксак мақомга эга экани кўриниб турибди.
«Албатта, у ҳузуримиздаги она китобдадир...».
Уламоларимиз, «Она китоб»дан мурод Лавҳул Маҳфуз», деганлар. Демак, Қуръони Карим Аллоҳ таолонинг ҳузуридаги Лавҳул Маҳфузда сақланган. Бу эса Аллоҳ таоло уни нақадар зўр қадрлаганини кўрсатади.
«...батаҳқиқ олийдир, ҳикматлидир».
Яъни, Қуръон олий мартабали ва серҳикмат Китобдир.
Шунга қарамай, одамлар бу Китобни инкор қиладилар, унга шак келтирадилар ва ундан юз ўгирадилар.
Аллоҳ таоло яна:
«Албатта, у(Қуръон) сенга ҳам, қавмингга ҳам шарафдир. Ва албатта сўралурсизлар», деган («Зухруф» сураси, 44-оят).
«Эй Муҳаммад, ҳеч шубҳа йўқки, албатта, сенга туширилган Қуръон сен учун шон-шарафдир, шунингдек, сенинг қавмингга ҳам шон-шарафдир».
Дарҳақиқат, Қуръони Карим Муҳаммад соллаллоҳу алайҳи васалламга шону шараф бўлди. Ушбу абадий илоҳий мўъжиза бўлмиш Қуръон у зоти бобаракотнинг зикрларини бутун оламга таратди, бутун оламда миллионлаб одамларни у зотга уммат қилди. Сон-саноқсиз мўмин-мусулмонлар томонидан доимий равишда у зотга салавоту саломлар айтилиб туришига сабаб бўлди.
Шунингдек, Қуръони Карим Муҳаммад соллаллоҳу алайҳи васаллам қавмларига ҳам шону шараф келтирди. Улар бутун дунёга Қуръон уммати сифатида танилдилар. Қуръонга амал қилароқ, дунёнинг пешқадам умматига айландилар. Дунёдаги барча халқлар уларга ҳавас билан қарайдиган бўлди. Улар оятдаги «ва албатта сўралурсизлар» жумласини ҳис этиб яшаганлари, Қуръон орқали ўзларига юклатилган масъулиятни бажаришга сидқидилдан ҳаракат қилганлари учун Қуръон уларга шону шараф бўлди.
Аммо афсуски, вақт ўтиши билан бу ҳис сусайди. Қавм аста-секин Қуръондан четлади. Қавм ўз зиммасига юкланган масъулиятдан ўзини тортди.
Бунинг натижасида улар дунё халқлари сафининг охирига тушиб қолдилар. Қуръон ҳам уларга шон-шараф келтирмай қўйди. Энди бу қавм шон-шарафга фақат Қуръон орқалигина эришиши мумкинлигини тушуниб етиши керак.
Энди улар тезда келадиган қиёмат кунида Қуръонни уларга шону шараф қилиб берган Зот – Аллоҳ томонидан албатта сўралишларини чуқур ҳис этишлари керак. Бу ҳис эса ўз навбатида уларни жиддий амалга чорлаши керак.
«Ҳадис ва ҳаёт» китобининг 30-жузи
Ушбу китоб Ўзбекистон Республикаси Дин ишлари бўйича қўмитанинг 2024 йил 23 январдаги 03-07/362-рақамли хулосаси асосида тайёрланди.
© islom.uz 2003-2026.
Барча ҳуқуқлар ҳимояланган. Сайтдан маълумот олинганда манба кўрсатилиши шарт.
Email: admin@islom.uz
Telegram: @portalislomuzadmin_bot
Ўзбекистон, Тошкент, 100185
Сўгалли ота кўчаси, 5-уй
