Хотин-қизларга салом бериш жоизми?
Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.
Ёши катта қизлар ёки аёллар салом берса, алик олиш керакми? Агар кичкина қизчалар салом беришса-чи?
Жавоб: Бисмиллаҳир роҳманир роҳийм.
Салом бериш суннат, эшитган киши учун эса алик олиш фарздир. Таълим бўлиши ва эркалатиш учун кичкина болаларга салом берилади. Бегона қизларга салом бериш макруҳдир.
Умму Ҳонеъдан ривоят қилинади:
«Набий соллаллоҳу алайҳи васалламнинг ҳузурларига борсам, ғусл қилаётган эканлар. Шунда у зотга салом бердим.
«Ким бу?» дедилар.
«Умму Ҳонеъ», дедим.
«Марҳабо», дедилар».
Бухорий «Адабул муфрад»да ривоят қилган.
Шарҳ: Умму Ҳонеъ розияллоҳу анҳо Расулуллоҳ соллаллоҳу алайҳи васалламнинг амакилари Абу Толибнинг қизлари бўладилар. Ҳадисдаги воқеа Расулуллоҳ соллаллоҳу алайҳи васаллам Мадинаи Мунавварадан Маккаи Мукаррамага борганларида, Умму Ҳонеънинг уйларида меҳмон бўлиб турганларида бўлиб ўтган.
Расулуллоҳ соллаллоҳу алайҳи васаллам Каъбаи Муаззамага боришдан аввал ғусл қилаётган бўлганлар. Шу пайтда уйнинг бекаси келиб қолиб, салом берган. Бундан аёл кишининг эркак кишига салом бериши дурустлиги келиб чиқади.
Муборакдан ривоят қилинади:
«Ҳасаннинг, «Аёллар эркакларга салом берар эдилар», деганини эшитдим».
Бухорий «Адабул муфрад»да ривоят қилган.
Аввал ўтган улуғларда аёлларнинг эркакларга салом бериши бор нарса экан.
© islom.uz 2003-2026.
Барча ҳуқуқлар ҳимояланган. Сайтдан маълумот олинганда манба кўрсатилиши шарт.
Email: admin@islom.uz
Telegram: @portalislomuzadmin_bot
Ўзбекистон, Тошкент, 100185
Сўгалли ота кўчаси, 5-уй
