«Шайх Муҳаммад Содиқ Муҳаммад Юсуф» жомеъ масжидига «Cакинат» оила мактаби ўқувчилари ташриф буюришди
Бугун, 7 октябрь куни «Шайх Муҳаммад Содиқ Муҳаммад Юсуф» жомеъ масжидига «Cакинат» оила мактаби ўқувчилари ташриф буюришди. Ташрифдан аввал ўқувчилар фазилатли шайх Муҳаммад Содиқ Муҳаммад Юсуф ҳазратларининг қабрларини зиёрат қилиб келганларини айтиб ўтишди. Улар ушбу мактабда таълим олиш давомида ҳазратнинг укалари Муҳаммад Амин ҳожи аканинг қаламларига мансуб «Исломга бағишланган умр» китобларини ўқиб чиққанларини таъкидлаб ўтдилар. Китобдаги маълумотлар ҳақида масжид имом ноиби Ҳасанхон Яҳё Абдулмажид билан ўртоқлашдилар. Ўқувчиларнинг ҳазрат ҳақларида олган маънавий-маърифий маълумотлари ҳар қандай кишини қувонтиради. Хусусан, Аслиддин исмли ўқувчи шайх ҳазратларининг ҳаётлари қай йўсинда ўтганлиги, кўп китоб мутолаа қилганлари, ҳаётнинг оғир синовларини мустаҳкам ирода билан енгиб ўтганлари ҳақида китобдан ўқиганларини айтиб берди. Суҳбат асносида болажонлар ҳазрат геометрия фанини яхши кўрганларини, келажакда шайх ҳазратларига ўхшаб етук олим, уламо бўлишларини ният қилдилар. Бошқа ўқувчилар ҳам ўзларининг ҳазрат ҳақидаги ўй-фикрларини гапириб бердилар. Зиёрат давомида устоз Ҳасанхон Яҳё Абдулмажид ўқувчиларга самимий насиҳатларини бериб, улар билан савол-жавоб ўтказдилар. Ўқувчилар берилган саволларга аниқ ва равон тарзда жавоб бердилар. Учрашув сўнгида устоз болажонлар ҳақига дуолар қилиб бердилар.
© islom.uz 2003-2024.
Барча ҳуқуқлар ҳимояланган. Сайтдан маълумот олинганда манба кўрсатилиши шарт.
Email: admin@islom.uz
Telegram: @portalislomuzadmin_bot
Ўзбекистон, Тошкент, 100185
Сўгалли ота кўчаси, 5-уй
