1442 йил 8 рабиъул аввал | 2020 йил 25 октябрь, якшанба
Минтақа:
ЎЗ UZ RU EN
Силаи раҳм

50-боб. Ёш болаларни ўпиш

09:10 / 10.07.2019 1611 pdf Ўқиш режими + -

Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.

90. Оиша розияллоҳу анҳодан ривоят қилинади:

«Бир аъробий Набий соллаллоҳу алайҳи васалламнинг ҳузурларига келиб:

«Сизлар ёш болаларингизни ўпасизларми? Биз ўпмаймиз», деди.

Шунда Набий соллаллоҳу алайҳи васаллам:

«Аллоҳ қалбингдан раҳматни суғуриб олган бўлса, мен нима ҳам қила олар эдим», дедилар».

Шарҳ: Демак, жажжи болаларни ўпиш кишининг қалбида раҳмат борлигининг аломати экан. Аксинча, ёш болаларни ўпмаслик қалбда раҳматнинг йўқлиги аломати экан.

Бола боқиш иши машаққатли экани ҳамда бола доимо меҳрга ва раҳм-шафқатга муҳтож бўлгани учун ҳам Исломда болага раҳмли бўлиш катта савобли иш даражасига кўтарилган. Ҳар бир ота-она бу улкан ҳақиқатни зинҳор унутмаслиги даркор.

Ушбу ҳадисдан олинадиган фойдалар:

1. Ёш болаларни ўпиш фазилат экани.

2. Ёш болаларни ўпиш раҳмдиллик белгиси экани.

3. Баъзи одамларнинг қалбидан Аллоҳ таоло раҳматни суғуриб олиши.

4. Болаларни ўпмаслик яхши эмаслиги.

91. Абу Ҳурайрадан ривоят қилинади:

«Расулуллоҳ соллаллоҳу алайҳи васаллам Ҳасан ибн Алини ўпдилар. Ул зотнинг ҳузурларида Ақраъ ибн Ҳобис Тамиймий ўтирган эди. Шунда Ақраъ:

«Менинг ўнта болам бор. Улардан бирортасини ҳам ўпмаганман», деди.

Расулуллоҳ соллаллоҳу алайҳи васаллам унга қарадилар. Кейин:

«Ким раҳм қилмаса, унга раҳм қилинмайди», дедилар».

Шарҳ: Расулуллоҳ соллаллоҳу алайҳи васаллам айтган бу гапларнинг маъноси – ким бандага раҳм қилмаса, Аллоҳ таоло унга ҳам раҳм қилмайди, деганидир.

Бандаларга раҳм қилишнинг энг олий намунаси ёш болаларга раҳм қилишдир. Чунки улар раҳм-шафқатга энг муҳтож тоифадирлар.

Шундай бўлганидан кейин, ҳар бир ота-она ўз боласига меҳрибон бўлиши, уларга раҳм-шафқатли бўлиши лозим.

Ушбу ҳадисдан олинадиган фойдалар:

1. Набий соллаллоҳу алайҳи васаллам кичик болаларни ўпганлари.

2. Ўша пайтда ўнта боласидан бирортасини ҳам ўпмаган шахс бўлгани.

3. Боласига раҳм кўрсатган ота-оналарга Аллоҳ таоло ҳам раҳм қилиши.

4. Фарзандига раҳмли бўлиш ота-онанинг вазифаси экани.

«Одоблар хазинаси» китобидан

 

Муаллиф
Шайх Муҳаммад Содиқ Муҳаммад Юсуф
Манба
islom.uz
Мавзуга оид мақолалар
63. Абдуллоҳ ибн Абу Авфодан ривоят қилинади.Набий соллаллоҳу алайҳи васаллам .Албатта, ораларида қариндошлик алоқасини узган кимса бор қавмга раҳмат тушмайди,, давоми...

902 14:30 / 15.03.2019
89. Анас ибн Моликдан ривоят қилинади.Оиша розияллоҳу анҳонинг ҳузурига бир аёл келди. Оиша унга учта хурмо берди. У ҳар бир боласига биттадан хурмо бериб, ўзи учун давоми...

588 20:00 / 01.07.2019
Динимизда қўшничилик алоқаларини яхшилашга катта эътибор берилган. Инсон бир маҳаллада яшар экан, деярли ҳар куни, шунингдек, тўй, ҳашар ва бошқа ҳолатларда давоми...

1315 15:04 / 18 июль
Бизнинг динимизда фақат мусулмон кексаларни эъзозлаш билан чегараланиб қолинмаган. Бу иш кенг миқёсда бўлиб, мусулмонлар билан бир диёрда яшаб турган давоми...

631 20:02 / 03 апрель
Топ рейтинг www.uz Openstat