1446 йил 21 муҳаррам | 2024 йил 27 июль, шанба
Минтақа:
ЎЗ UZ RU EN
Пайғамбарлар қиссаси

Умматим, умматим деб йиғлаган зот

11:00 / 06.02.2021 2481 pdf Ўқиш режими + -

Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.

(биринчи мақола)

Ота-онамизни, ака-ука, опа-сингилларимизни, фарзандларимизни нега яхши кўрамиз? Чунки уларни яқиндан таниймиз, нима ёқтиришлари, нима кийишлари, қандай гапиришлари, қандай юришларини пухта биламиз. Қолаверса, ўртада ота-болалик, она-болалик, қондошлик, жигарлик ришталари ҳам бор.

Баъзан танимаган кишимиз билан оддий кўришсак, бирор киши келиб, ўша одамнинг биз яқиндан танийдиган танишимизнинг ўғли ёки укаси эканини айтса, ўртадаги масофа қисқариб, аввалгидан кўра яқинроқ масофада кўришамиз.

Аллоҳ таоло Қуръони Каримда шундай деб марҳамат қилган:

 لَقَدْ جَاءَكُمْ رَسُولٌ مِّنْ أَنفُسِكُمْ عَزِيزٌ عَلَيْهِ مَا عَنِتُّمْ حَرِيصٌ عَلَيْكُم بِالْمُؤْمِنِينَ رَءُوفٌ رَّحِيمٌ۝ 

«Батаҳқиқ, сизларга ўзингиздан бўлган, машаққат чекишингиз унинг учун оғир бўлган, сизни ардоқловчи, мўминларга мушфиқ, меҳрибон Расул келди» (Тавба сураси, 128-оят)

Аллоҳ таоло бу оятда Пайғамбаримиз соллаллоҳу алайҳи васалламнинг бир неча сифатлари баён этяпти. Булар:

Ўзингиздан бўлган.

Яъни, фариштадан эмас, инсон наслидан бўлган Пайғамбар.

Машаққат чекишингиз унинг учун оғир бўлган.

Яъни, мўминларнинг қийналишлари, озорга учрашлари Пайғамбаримиз соллаллоҳу алайҳи васалламга оғир бўлган.

Сизни ардоқловчи.

Яъни, сизнинг ҳидоят топишингизга ҳарис, ҳақ йўлда бўлишингизга ўч бўлган Пайғамбар.

Мўминларга мушфиқ, меҳрибон.

Яъни, ўз умматлари учун мушфиқ, меҳрибон, уларга осонликни истайдиган, машаққат бўлишини истамайдиган Пайғамбар.

Пайғамбаримиз соллаллоҳу алайҳи васаллам биз умматлари учун ана шундай меҳрибон, ҳидоятда бардавом бўлишимизга ҳарис, мушфиқ эдилар. Биз ҳамма инсонлардан ҳам кўпроқ у зот соллаллоҳу алайҳи васалламни яхши кўришимиз керак.

Анас ибн Молик розияллоҳу анҳудан ривоят қилинади:

«Расулуллоҳ соллаллоҳу алайҳи васаллам: «Сизлардан бирорталарингиз мени фарзандидан, ота-онасидан ва одамларнинг барчасидан кўра кўпроқ яхши кўрмагунча ҳақиқий мўмин бўлолмайди», дедилар.

Хўш, биз Пайғамбаримиз соллаллоҳу алайҳи васалламни барча инсонлардан кўра кўпроқ яхши кўрамизми?

Биз Пайғамбаримиз соллаллоҳу алайҳи васалламни ота-онамиз, оила аъзоларимиздан кўра яхшироқ, яқинроқ таниймизми? Биз ахир у зот алайҳиссаломнинг умматларимиз.

У зот соллаллоҳу алайҳи васаллам:

• қандай инсонларни ёқтиришларини

• қандай амалларни ёқтиришларини

• хулқлари

• либослари

• оилавий ҳаётлари қандай бўлганини

• фарзандлари

• жуфту ҳалоллари кимлигини

• фазилатлари қандай бўлгани

• қанча ғазотларда иштирок этганлари

• нечта ҳарбий гуруҳни турли жойларга юборганлари

• инсонлар билан қандай муомала қилишлари

• насаблари

• ташқи кўринишлари қандайлиги

• қачон пайғамбарлик келгани

• ваҳийни қандай қабул қилишлари

• Маккада неча йил турганлари

• Исро ва Меърож воқеалари қачон, қандай содир бўлгани

• ҳижратлари

• Мадинада қанча яшаганлари

• неча ёшларида Рафийқул Аълога интиқол қилганларини биламизми?

Агар шуларни ихлос билан ўргансак, у зот соллаллоҳу алайҳи васалламни қаттиқ яхши кўриб қоламиз.

Ўзимизга савол берайлик:

«Пайғамбаримиз соллаллоҳу алайҳи васалламни кўпроқ яхши кўраманми ёки ота-онамними? Ёки фарзандларимними? Ёки оиламними? Ёки ака-укаларимними? Ёки опа-сингилларимними? Ёки пул, тижоратними? Ёки машинамними?»

Бу саволга нима дея оламиз? Бу кимнидир имтиҳон қилиш эмас, ҳар бир одам саволни ўзига бергач, ҳолатини ўзи билади.

Пайғамбаримиз соллаллоҳу алайҳи васаллам биз умматларини ўйлаб, кўзларига ёш олдилар. Умматим, умматим” деб изтироб чекдилар. «Биродарларимни кўргим келди» деб, у зот биз умматларини «Биродарларим» деб атадилар. Шундай Пайғамбар соллаллоҳу алайҳи васалламни севмай бўладими?

Ҳабибимиз соллаллоҳу алайҳи васалламни қандай яхши кўришни саҳобаи киромлардан ўрганамиз. Улар гаплари орасида тез-тез «Жоним сизга фидо бўлсин!» дердилар.

Пайғамбаримиз соллаллоҳу алайҳи васалламни ота-онамиздан, фарзандларимиздан, ўзимиздан ва барча инсонлардан кўра кўпроқ яхши кўрмагунимизча, иймонимиз комил бўлмаслигини унутмайлик!

Севикли Пайғамбаримиз соллаллоҳу алайҳи васалламни кўпроқ, яқинроқ танишга уринайлик ва бу уринишимизни йил бўйи давом эттирайлик!

(Давоми бор)

Нозимжон Ҳошимжон тайёрлади

Муаллиф
Нозимжон Ҳошимжон
Манба
islom.uz
Мавзуга оид мақолалар
Аллоҳ таоло Шуайбнинг исмларини Қуръон Каримда ўн марта келтирган. У зот алайҳиссалом Аъроф, Ҳуд, Шуаро ва Анкабут сураларида зикр қилинганлар.У зотнинг давоми...

11828 15:52 / 28.04.2017
Ҳизр алайҳиссалом тўғрисида гаплар ниҳоятда кўп. Бу гапларнинг ичида ҳақиқатга яқинидан ҳақиқатга узоқлари кўп. Кўпчиликнинг ичида Ҳизр алайҳиссалом абадий бир давоми...

13151 15:55 / 28.04.2017
Аллоҳ таоло Лут алайҳиссаломнинг исми шарифларини Қуръони Каримда 27 марта зикр қилган. У зотга тегишли ояти карималар Ҳуд, Ҳижр, Ҳаж, Шуаро, Намл, Анкабут, Сод, Қоф, давоми...

28503 12:30 / 30.03.2021
...Бу сураи каримада бошқаларидан фарқли ўлароқ, кўпроқ оилавий муносабатлардаги салбий ўринларга, ҳукмрон доиралар ичидаги ихтилофларга, уларнинг давоми...

43518 15:55 / 28.04.2017
Аудиолар

125302 11:58 / 10.10.2018
«Ҳилол» журнали
Китоблар

46332 14:35 / 11.08.2021