Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.

Мажлис-давраларда икки киши бир-бирининг қулоғига шивирлаб, пинҳона гаплашмайди, мажлис аҳлининг баъзилари билиб, бошқалари билмайдиган тилда сўзлашилмайди. Икки киши бир-бирига сир айтса, уларнинг ўртасига кириб, гапига қулоқ солинмайди.

عَنْ عَبْدِ اللهِ رَضِيَ اللهُ عَنْهُ : أَنَّ رَسُولَ اللهِ وَسَلَّمَ عَلَيهِ اللهُ صَلَّى قَالَ: إِذَا كَانُوا ثَلَاثَةً، فَلَا يَتَنَاجَى اثْنَانِ دُونَ الثَّالِثِ. رَوَاهُ الْبُخَارِيُّ.

Абдуллоҳ розияллоҳу анҳудан ривоят қилинади:

«Расулуллоҳ соллаллоҳу алайҳи васаллам:

«Агар уч киши бўлса, иккитаси учинчини қўйиб, пичирлашмайди», дедилар».

Бухорий ривоят қилган.

Учинчи кишидан яшириб, унга эшиттирмаслик мақсадида гапирилган гапдан ўша кишининг кўнглига озор етади. Шайтон васваса қилиб, унинг хаёлига турли бўлмағур фикрларни солади. Натижада мўмин кишига озор етади, мўминга озор бериш эса ҳаромдир.

«Ижтимоий одоблар» китобидан