Бировнинг ҳақини еб қўйган, кейин уни адо этмоқчи бўлган одам нима қил
Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.
Сизга қуйидаги саволлар билан мурожаат қилмоқчи эдим:
1. Мен олдинги собиқ совет тузумида армия сафида хизмат қилган вақтимда бир рус боланинг пулини ўғирлаб олган эдим. Ҳозирги кунда бу ишимнинг катта гуноҳлигини билиб, пулни қайтиб берай десам, у боланинг турар жойини билмайман.
2. Вақт ўтиб, давлат корхонасида омборчи бўлиб ишладим. У ерда ҳам ҳар хил маҳсулотларнинг граммидан уриб орттириб пул топдим.
Афсуски, қилган ишларим гуноҳ, нотўғри ишлар экан. Ҳозир, алҳамдулиллаҳ, ишларим яхши, ҳунарим орқасидан тирикчилик қиляпман. Албатта, бунинг учун Аллоҳ субҳанаҳу ва таолога чексиз ҳамду санолар ва шукроналар бўлсин. Лекин, олдинги қилган катта гуноҳларимни қандоқ ювсам бўлади? Бирор муҳтож одамга ҳозирги кунга ҳисоб қилиб беришим керакми? Жавобингиз учун раҳмат.
ЖАВОБ: Бисмиллаҳир Роҳманир Роҳийм
Бировнинг ҳақи ҳеч қачон бошқага мулк бўлмайди. Шу боис, ўғирлик, тарозидан уриш ва бошқа шу каби ношаръий йўллар билан ўзлаштирилган мол-мулк аввало ўз эгасига қайтарилиши керак. Агар, сиз айтгандек, бунинг иложи бўлмаса, ўша қийматдаги маблағни камбағал, бева-бечора кишиларга бериб юборилади. Мабодо, ўша ҳақни эгаси сўраб келса, тушунтирилади, агар кўнмаса, тўлаб берилади.
Қилган ишингизга тавба қилинг, надомат чекинг, қайта қилмасликка аҳд қилинг ва олган нарсангиз миқдорида камбағалларга хайру эҳсон қилинг. Валлоҳу аълам.
© islom.uz 2003-2025.
Барча ҳуқуқлар ҳимояланган. Сайтдан маълумот олинганда манба кўрсатилиши шарт.
Email: admin@islom.uz
Telegram: @portalislomuzadmin_bot
Ўзбекистон, Тошкент, 100185
Сўгалли ота кўчаси, 5-уй
