Имомликка ким ҳақлироқ
Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.
Юқоридаги саволга бугун намоз ҳукмларини жуда яхши биладиган фиқҳ илмининг билимдони бўлган киши имомликка ҳақлироқ деб жавоб берилса, маъқул бўлади.
Шу билан бирга, қадимги фуқаҳоларимиз ўзларида жам бўлган барча далилларни ва билимларни ишга солиб, бу саволга тартиби билан жавоб берганлар. Ана ўша жавоб билан танишиб қўймоғимиз лозим.
Ҳанафий мазҳаби бўйича фаҳш ишлардан четланган, намознинг ҳукмларини яхши биладиган ва Қуръондан фарз миқдорича ёдлаган имомликка энг ҳақли одам лойиқ саналади.
Бу сифатлар тенг бўлиб қолса, Қуръон тиловатини ва тажвидини яхшироқ биладиган шахс ҳақлироқ бўлади.
Сўнгра шубҳали нарсалардан ҳам ўзини четга олиб юрадиган тақволи одам.
Кейин ёши улуғроқ киши.
Сўнгра хулқ-атвори гўзалроқ бўлган шахс.
Кейин таҳажжудни кўп ўқийдиган одам.
Сўнгра насаби шарафлироқ киши.
Кейин кийими покизароғи лойиқ саналади.
Имомликка даъвогарлар мазкур сифатларда тенг бўлиб қолсалар, ораларида қуръа ташланади ёки сайловда кўп овоз олган киши бўлади.
Авваллари намозга ҳозир бўлганлар ичида ҳоким бўлса, у, бўлмаса, амир, у ҳам бўлмаса, қози, манзил эгаси ўтган. Намозга ўтишга энг ҳақли киши масжиднинг имоми бўлган.
© islom.uz 2003-2024.
Барча ҳуқуқлар ҳимояланган. Сайтдан маълумот олинганда манба кўрсатилиши шарт.
Email: admin@islom.uz
Telegram: @portalislomuzadmin_bot
Ўзбекистон, Тошкент, 100185
Сўгалли ота кўчаси, 5-уй
