Ҳаж мавсумидаги адолат мажлиси
Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.
Ибн Саъд Атодан ривоят қилади:
«Умар ибн Хаттоб розияллоҳу анҳу омилларига ҳаж мавсумида унинг ҳузурига келишларини амр қилар эди. Улар жамланганда:
«Эй одамлар! Мен ўз омилларимни сизларнинг жонларингиз ва молларингизга мусибат етказишлари учун юборганим йўқ. Уларни ораларингизда тўсиқ бўлишлари учун ва пайларингизни бўлиб беришлари учун юборганман. Кимга шундан бошқа иш қилинган бўлса, турсин!» деди.
Бир одамдан бошқа ҳеч ким турмади. У одам туриб:
«Эй мўминларнинг амири, сизнинг омилингиз фалончи мени юз дарра урди», деди.
«Нима учун уни урдинг! Тур, у қасосини олсин!» деди Умар.
Шунда Амр ибн Осс розияллоҳу анҳу туриб:
«Эй мўминларнинг амири, агар бу ишни қилсангиз, гап кўпаяди ва сиздан кейингилар ҳам шундай қилишни одат қилиб олишади», деди.
«Расулуллоҳ соллаллоҳу алайҳи васаллам ўзларини қасос олишга тутиб берганларида, мен қасос олишга шароит яратмайми?!» деди Умар.
«Ўзимизга қўйиб беринг. Уни рози қиламиз», деди Амр ибн Осс.
«Бу сизларнинг ишингиз. Рози қилинглар», деди Умар.
Унга икки юз динор, яъни ҳар қамчига икки динордан фидя берилди».
«Ҳадис ва ҳаёт» китобининг 23-жузидан олинди
Ушбу китоб Ўзбекистон Республикаси Вазирлар Маҳкамаси ҳузуридаги Дин ишлари бўйича қўмитанинг 2021 йил 24 августдаги 03-07/5165 рақамли хулосаси асосида чоп этилган.
© islom.uz 2003-2024.
Барча ҳуқуқлар ҳимояланган. Сайтдан маълумот олинганда манба кўрсатилиши шарт.
Email: admin@islom.uz
Telegram: @portalislomuzadmin_bot
Ўзбекистон, Тошкент, 100185
Сўгалли ота кўчаси, 5-уй
