Ота-онага оро бериш хизмати
Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.
عَنِ الْمُعْتَمِرِ بْنِ سُلَيْمَانَ، عَنْ أَبِيهِ: أَنَّ مُوَرِّقًا كَانَ يُفْلِي رَأْسَ أُمِّهِ.
Муътамир ибн Сулаймон отасидан ривоят қилади:
«Муварриқ онасининг бошини қараб қўяр эди».
Шарҳ: Яъни онасининг сочларини секин-секин силаб, тагида олиб ташлайдиган нарса борми, бит борми, тозалаб қўяр экан. Онанинг хизмати шу даражага етган экан.
Эркак киши шу даражада онасининг хизматини қилиши ҳар қанча таҳсинга сазовор иш. Мўмин-мусулмонлар ичида доимо бу каби ишларни ихлос билан қилиб, ота-онасининг розилигини топган фарзандлар кўп бўлган.
عَنْ مُنْذِرٍ الثَّوْرِيِّ قَالَ: كَانَ مُحَمَّدُ بْنُ الْحَنَفِيَّةِ يُمَشِّطُ رَأْسَ أُمِّهِ وَيَرْوِيهَا.
Мунзир Саврийдан ривоят қилинади:
«Муҳаммад ибн Ҳанафия онасининг сочини тараб, ювиб қўяр эди».
Шарҳ: Эркак киши, яъни ўғил онасининг хизматини шу даражада қилар, ҳаттоки унинг сочини тараб, ювиб қўяр экан. Мана бу ҳам мусулмон фарзанднинг онасига қилган хизмати, эҳтиромининг бир кўриниши ҳисобланади.
Ота-онага оро бериш бўйича шунга ўхшаш бошқа хизматларни қилиш ҳам фарзанднинг бурчидир. Айниқса, ота-она кексайиб, кийиниши, ўзига оро бериши қийинлашиб қолганда фарзандлар ҳушёр бўлишлари, баъзи бир хизматларни арзимаган ҳисоблаб, ота-онанинг уринишига бепарво қараб турмасликлари лозим.
«Яхшилик ва силаи раҳм» китоби 1-жуз.
Ушбу китоб Ўзбекистон Республикаси Дин ишлари бўйича қўмитанинг 2022 йил 5 октябрдаги 03-07/7613-рақамли хулосаси асосида тайёрланган.
© islom.uz 2003-2025.
Барча ҳуқуқлар ҳимояланган. Сайтдан маълумот олинганда манба кўрсатилиши шарт.
Email: admin@islom.uz
Telegram: @portalislomuzadmin_bot
Ўзбекистон, Тошкент, 100185
Сўгалли ота кўчаси, 5-уй
