Татаристон 2022 йилги Ҳаж ибодатига тайёргарликни бошлади
Саудия Арабистони ҳукумати Sputnik V вакцинаси билан эмланган хорижликларга мамлакатга ташриф буюришга рухсат берди. Бу ҳақда islam.ru сайти хабар берди. Татаристон мусулмонлари диний бошқармаси ҳозирда зарур тартиб-қоидаларни бошлаш, хусусан, Татаристон Республикасига зиёратчилар квотаси олиш бўйича маълумотлар тасдиқланишини кутмоқда.
Татаристондаги расмий ҳаж оператори, ДУМ РТ Ҳаж бош раҳбари Ранис Вахитов РБК Татаристонга маълум қилишича, минтақа мусулмонлари маъмурияти энди Sputnik V вакцинаси билан эмланган россияликларнинг Саудия Арабистонига киритилиши ҳақидаги маълумотни олиши лозим. Шундан сўнг улар барча муолажаларни, жумладан, Татаристонга зиёратчилар учун квота олишни бошлашлари мумкинлигини айтиб ўтган.
«Оммавий ахборот воситаларида Саудия Арабистони расмийлари Sputnik V билан эмланган россиялик мусулмонларга Ҳаж зиёратини адо этишига рухсат бергани ҳақидаги хабарни эшитганимиздан жуда хурсанд бўлдик», дейди ДУМ РТ ҳаж бош раҳбари Ранис Вахитов.
Вахитовнинг эслатишича, Татаристон Президенти Рустам Минниханов Жиддада бўлиб ўтган «Россия – Ислом дунёси» стратегик қарашлар гуруҳининг сўнгги йиғилишида бу масалага алоҳида тўхталиб ўтган. Унга кўра, Миннихонов Саудия Арабистони расмийларини бу қарорга кўндира олган.
Эмланган россияликларга Саудия Арабистонига киришга рухсат берилишини ўтган йили ноябрь ойида Татаристон Республикаси Президенти матбуот котиби Лилия Галимова маълум қилган. Унинг таъкидлашича, Миннихонов Саудия Арабистони ҳаж ва умра ишлари бўйича вазир ўринбосари Абдул Фаттоҳ ибн Сулаймон Машат билан учрашган ва у Россиядан келган мусулмонларга Sputnik V вакцинаси билан ҳажга боришга рухсат бериш имкониятини кўриб чиқишни сўраган.
Хуршид Маъруф
© islom.uz 2003-2024.
Барча ҳуқуқлар ҳимояланган. Сайтдан маълумот олинганда манба кўрсатилиши шарт.
Email: admin@islom.uz
Telegram: @portalislomuzadmin_bot
Ўзбекистон, Тошкент, 100185
Сўгалли ота кўчаси, 5-уй
