Тилингизга эҳтиёт бўлинг!
Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.
Умар розияллоҳу анҳу қўли шол бўлиб қолган кекса кишини кўриб, ундан "Қўлингга нима бўлди?" деб сўрадилар. У "Отам жоҳилият даврида "Қўлинг шол бўлсин!" деб дуоибад қилгандилар. Шундан кейин шол бўлиб қолган" деб жавоб берди. Бу гапни эшитган Умар розияллоҳу анҳу "Оталарнинг жоҳилият давридаги дуоси шундай бўлса, Исломга кириб, мусулмон ҳолда қилган дуоси қандай экан-а?!" дедилар.
Абу Ҳурайра розияллоҳу анҳудан ривоят қилинади:
«Набий соллаллоҳу алайҳи васаллам:
«Уч дуо мустажобдир. Уларда шак йўқ. Ота-онанинг дуоси, мусофирнинг дуоси ва мазлумнинг дуоси», дедилар».
Абу Довуд, Аҳмад ва Термизийлар ривоят қилишган.
Ота-онанинг фарзанди ҳаққига қилган дуоси ижобат бўлиши ушбу ҳадисда баён этилмоқда. Демак, ота-оналар фарзандларини нима деб дуо қилсалар, дуои хайрми ёки дуоибадми, ижобат бўлиб қолиши мумкин. Шунинг учун ота-оналар фарзандлари ҳаққига дуоибад қилишдан сақланиб, хайрли дуо қилишлари лозим.
لَا تَدْعُوا عَلَى أَنْفُسِكُمْ وَلَا تَدْعُوا عَلَى أَوْلَادِكُمْ وَلَا تَدْعُوا عَلَى أَمْوَالِكُمْ لَا تُوَافِقُوا مِنْ اللَّهِ سَاعَةً يُسْأَلُ فِيهَا عَطَاءٌ فَيَسْتَجِيبُ لَكُمْ
“Ўзингизни қарғаманг, болаларингизни ҳам қарғаманг, молингизни ҳам қарғаманг! Аллоҳ таолодан сўралган нарса сўссиз бериладиган вақтга мувофиқ келиб қолиб, дуоингиз ижобат бўлиб қолмасин тағин…” (Муслим ривояти).
Шундай вақтлар бўладики, унда Аллоҳ таоло биз бандаларининг сўраганимизни ато этади, дуоларимизни ижобат қилади. Бомдод вақти киришидан олдин, азон ва иқомат ўртасида, Жумъа кунида, Қуръони Карим тиловатидан сўнг, ибодатдан сўнг, ота-онанинг, мусофирнинг, мазлумнинг дуо қилаётган пайти каби лаҳзаларда дуолар ижобат бўлишидан умид қилинади. Шунинг учун ҳар қандай вақтда ҳам тилдан фақат яхши гапларни чиқариш, дуолар қилиш, гуноҳ, дуоибад бўладиган лафзлардан тийилишимиз даркор.
Биродарлар! Фарзандларимизнинг бирор аъзосига нуқсон етишига сабаб бўлмайлик, тилимизни тузатайлик! Болаларимизни дуоибад қилмайлик, тағин қилган дуоимиз ижобат соатига мувофиқ келиб, ижобат бўлиб қолмасин!
Аллоҳ раҳмат қилгур каттаямла (онажонимнинг оналарини каттая дердик) бирор набираларига танбеҳ бермоқчи бўлсалар, "оғзингга палов" дердилар. Ҳатто бир-биримизни сансираб чақиришимизга қарши эдилар. Агар акамизними ёки укамизними, бирорта кишини бўлса ҳам, сансирасак, "тавба қилинг, кечирим сўранг" дердилар.
Аллоҳ таоло барчамизнинг гуноҳларимизни мағфират этсин, Ўзининг ҳидоятидан айирмасин ва хотимамизни чиройли қилсин!
Интернет маълумотлари асосида Нозимжон Ҳошимжон тайёрлади
© islom.uz 2003-2025.
Барча ҳуқуқлар ҳимояланган. Сайтдан маълумот олинганда манба кўрсатилиши шарт.
Email: admin@islom.uz
Telegram: @portalislomuzadmin_bot
Ўзбекистон, Тошкент, 100185
Сўгалли ота кўчаси, 5-уй
