Рақобат ёхуд ниқобланган ҳасад
Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.
Мендан «бошқалар билан рақобатлашиш учун сенда нима етишмайди?», дея сўрабсан. Мен айтаманки, бошқалар билан рақобатлашиш лозим деб сенга ким айтди?!
Ҳаёт дегани бу сафардир, мусобақа эмас. Ундан фойдалан, уни жангга айлантирма.
Курашишга арзийдиган ягона майдон бу жаннатга олиб борадиган йўлдир. Бундан бошқаси зарарли жанглардир, мақсадсиз мусобақадир.
Тошбақа ҳам, қуён ҳам ахмоқдир. Ер юзидаги энг секин юрадиган ҳайвон устидан қозонган ғалабаси қуёнга қанақанги лаззат бериши мумкин?!
Қуён ухлаб қолганда орзусига эришган тошбақага бу мусобақадан нима фойда?!
Эй дўстим! Қалбингни покла. Бошқалар муваффақиятидан худди ўзингники каби қувон. Ғолибларга худди ўзингга қарсак чалгандек қарсак чал.
Бир савдогар бошқаси билан савдо шартномаси тузса, худди ўзинг шартнома тузгандек севин. Қўшнинг янги мансабга кўтарилса, худди ўзинг кўтарилгандек саодатни ҳис қил!
Бошқаларнинг қўлидаги нарсага қараш заҳарли ўқдир. Бу ўқ инсонларга етиб боришдан олдин ўз қалбингга қадалади.
Биз рақобат деб номлаб олган кураш аслида ниқобланган ҳасаддир. Аммо биз уни киришиш лозим бўлган жанг деб ўйлаб рақобат деб номлаб олганмиз.
Ёдингдан чиқмасинки, ҳасад самода Аллоҳ таолога энг аввал қилинган гуноҳдир. Иблис Одам алайҳис саломга сажда қилишдан бош тортди. Унинг кўрсатган сабаби «мен ундан яхшиман» эди.
Эсингдан чиқмасинки, ҳасад ер юзида Аллоҳ таолога қилинган гуноҳларнинг аввалгисидир. Қобил Ҳобилнинг хотини уникидан чиройли бўлгани учун Ҳобилни қатл қилди. Сенда Иблисдаги ва Қобилдаги нарса бўлатуриб «рақобат қилаяпман» деб ўзингни алдама.
Йўқ, дўстим! Сен ичингдан ёнаяпсан. Чунки бошқаларга берилган яхшилик сенга берилмади.
Қалбингга эътибор бер! Уни тозала. Уни зикр билан покиза қил. Кўзинг тушган ҳар-бир гўзалликка «бисмиллаҳ» айт. Ўзингга тегишли бўлмаган ҳар қандай ризққа «машааллоҳ» дегин. Аллоҳ сенга тақсим қилган нарсага рози бўл. Бутун умринг мусобақа билан ўтсада, ўзингникидан бошқа нарсага эриша олмайсан.
Абдулқодир Полвонов
© islom.uz 2003-2025.
Барча ҳуқуқлар ҳимояланган. Сайтдан маълумот олинганда манба кўрсатилиши шарт.
Email: admin@islom.uz
Telegram: @portalislomuzadmin_bot
Ўзбекистон, Тошкент, 100185
Сўгалли ота кўчаси, 5-уй
