Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.

وَسُئِلَ أَنَسٌ عَنِ الثُّومِ فَقَالَ: قَالَ رَسُولُ اللهِ صلى الله عليه وسلم: مَنْ أَكَلَ مِنْ هَذِهِ الشَّجَرَةِ فَلَا يَقْرَبَنَّا وَلَا يُصَلِّي مَعَنَا. رَوَاهُمَا مُسْلِمٌ.

«Анас розияллоҳу анҳудан саримсоқ пиёз ҳақида сўралди. Бас, у киши:

«Расулуллоҳ соллаллоҳу алайҳи васаллам:

«Ким ушбу экиндан еса, бизга яқин келмасин ва биз билан намоз ўқимасин», деганлар», деди».

Муслим ривоят қилган.

Шарҳ: Бу ерда гап саримсоқ пиёзни хом ҳолида ейиш тўғрисида бормоқда. Уни хом ҳолида еган одамдан ноқулай ҳид келиб туриши ҳаммага маълум. Киши хом саримсоқни еб олиб, масжидга борса, ўзидаги нохуш ҳид билан ҳаммага озор беради. Шу боисдан Набий соллаллоҳу алайҳи васаллам ушбу ҳадисни айтганлар.

Бинобарин, саримсоқ пиёздан бошқа нарса туфайли ундан озор ҳосил бўлса ҳам, у нарса ман қилинган бўлади. Мусулмон киши масжидга озода, хушбўй бўлиб бориши керак.

«Ҳадис ва ҳаёт» китобидан