Диёнат пойтахти
Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.
Ёш бир новда эрта тонгда дарахт бўлибди,
Буни кўрган набототлар карахт бўлибди.
Дунё узра таралмоқда гўзал бир садо:
Пойтахтимиз диёнатга пойтахт бўлибди!
Бу ҳолатдан маҳзун бўлиб йиғлар салиблар,
Кўкрагига шамол теккан шодон ғариблар!
Қадим Шошнинг шавкатини ёдга солиблар
Пойтахтимиз диёнатга пойтахт бўлибди!
Эй биродар, сиз ҳам бунда биз билан юринг,
Кўкалдош-у, Хастимом-ла бир сафда туринг.
Бухорий-ю, Термизийнинг давомин кўринг:
Пойтахтимиз диёнатга пойтахт бўлибди!
Хаёллардан ўтмасин ҳеч «бежиз сайлаган»,
Бу масканга уламолар меҳр бойлаган.
Куни кеча мустабидга хизмат айлаган
Пойтахтимиз диёнатга пойтахт бўлибди!
«Ҳайя алал фалаҳ, дема мозористонда!»
Деб Отабек жар солмишдир ул ўткан кунда.
Бизни қутланг, қора булут тарқаган онда
Пойтахтимиз диёнатга пойтахт бўлибди!
Энди, дўстлар, теран кўз-ла боқиб ҳаётга,
Мос яшайлик бундан буён исломиятга!
Шунда шояд етишсак чин салоҳиятга -
Пойтахтимиз диёнатга пойтахт бўлибди!
Хайрулла Хамидов
© islom.uz 2003-2026.
Барча ҳуқуқлар ҳимояланган. Сайтдан маълумот олинганда манба кўрсатилиши шарт.
Email: admin@islom.uz
Telegram: @portalislomuzadmin_bot
Ўзбекистон, Тошкент, 100185
Сўгалли ота кўчаси, 5-уй
