Қуръони Каримда хулқ баёни келган оятлар
Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.
Расулуллоҳ соллаллоҳу алайҳи васаллам дедилар:
«Гўзал хулқларни мукаммал қилишга юборилдим».
Имом Байҳақий ривояти.
1. «Адолат қилингки, у тақвога яқинроқдир» (Моида сураси, 8-оят).
2. «Адолат ила туринг ҳамда агар ўзингиз, ота-онангиз ва қариндошларингиз зиддига бўлса ҳам, Аллоҳ учун гувоҳлик берувчи бўлинг» (Нисо сураси, 135-оят).
3. «Бас, ўлчовни тўлиқ ўлчанглар ва камайтирувчилардан бўлманглар» (Шуаро сураси, 181-оят).
4. «Ўлчаш чоғингизда тўлиқ ўлчанг ва тўғри тарози ила тортинг» (Исро сураси, 35- оят).
5. «Агар аҳдлашсангиз, Аллоҳнинг аҳдига вафо қилинг», (Наҳл сураси, 91- оят).
6. «Қасамларингизни муҳофаза қилинг» (Моида сураси, 89-оят).
7. «Яхшилик ва тақво йўлида ҳамкорлик қилинг» (Моида сураси, 2-оят).
8. «Гуноҳ ва душманлик йўлида ҳамкорлик қилманг» (Моида сураси, 2-оят).
9. «...Одамларга яхши гаплар айтинг» (Бақара сураси, 83-оят).
10. «Аллоҳга тақво қилинглар ва тўғри сўз сўзланглар», (Аҳзоб сураси, 70-оят).
11. «Сизга ризқ қилиб берган нарсаларимиздан на олди-сотди, на ошна-оғайничилик ва на шафоатчилик йўқ Кун келмасидан олдин нафақа қилинг» (Бақара сураси, 254- оят).
12. «Ва етимларга ўз молларини беринг» (Нисо сураси, 2-оят).
13. «Нопокни покка алмаштирманг» (Нисо сураси, 2-оят).
14. «Бас, улардан енглар ва бечора ва фақирларга ҳам егизинглар» (Ҳаж сураси, 28-оят).
15. «...Ота-онага яхшилик қиласиз ва қариндошларга, етимларга, мискинларга» (Бақара сураси, 83-оят).
16. «Қачонки сизга бир саломлашиш ила салом берилса, ундан кўра яхшироқ алик олинг ёки худди ўзидек жавоб беринг» (Нисо сураси, 86-оят).
17. «Исломга тўлиғича киринг ва шайтоннинг изидан эргашманг» (Бақара сураси, 208-оят).
18. «Кўп гумонлардан четда бўлинглар, чунки баъзи гумонлар гуноҳдир» (Ҳужурот сураси, 12-оят).
19. «Жосуслик қилманглар» (Ҳужурот сураси, 12-оят).
20. «Баъзиларингиз баъзиларингизни ғийбат қилмасин» (Ҳужурот сураси, 12-оят).
21. «Бир қавм бошқасини масхара қилмасин, эҳтимол улар булардан яхшироқдир (Ҳужурот сураси, 11-оят).
22. «Ва ўзингизни ўзингиз мазах қилманг, бир-бирингизга лақаб қўйманг (Ҳужурот сураси, 11-оят).
23. «Бир-бирларингизнинг молларингизни ботил йўл билан еманг» (Бақара сураси, 188-оят).
24. «Садақаларингизни миннат ва озор бериш билан, Аллоҳга ва охират кунига иймон келтирмаса ҳам, молини одамлар кўриши учун нафақа қилганга ўхшаб, ботил қилманг» (Бақара сураси, 264-оят).
25. «Роббингнинг йўлига ҳикмат ва яхши мавъиза ила даъват қил» (Наҳл сураси, 125-оят).
26. «Яхшилик билан ёмонлик баробар бўлмас. Яхши бўлган нарса ила даф қил» (Фуссилат сураси, 34-оят).
27. «Кечиримли бўл, маъруфга буюр...» (Аъроф сураси, 199-оят).
28. «Ва жоҳиллардан юз ўгир» (Аъроф сураси, 199-оят).
29. «Юришингда мўътадил бўл» (Луқмон сураси, 19-оят).
30. «...ва овозингни пасайтир» (Луқмон сураси, 19-оят).
31. «Мўминларга қанотингни пастлат!» (Ҳижр сураси, 88-оят).
32. «Одамлардан такаббур-ла юз ўгирма...» (Луқмон сураси, 18-оят).
33. «...ва ер юзида кибр-ҳаво ила юрма» (Луқмон сураси, 18-оят).
34. «Ўзинг билмаган нарсага эргашма!» (Исро сураси, 36-оят).
35. «Ва ҳақни ботилга аралаштирманг ва ўзингиз билиб туриб ҳақни беркитманг» (Бақара сураси, 42- оят).
36. «...Ер юзида ёмонликда ҳаддан ошиб, бузғунчилардан бўлманг!» (Бақара сураси, 60-оят).
37. «...Ва тажовузкорлик қилманг. Албатта, Аллоҳ тажовузкорларни севмас» (Бақара сураси, 190-оят).
Манба: @arabicuz
© islom.uz 2003-2026.
Барча ҳуқуқлар ҳимояланган. Сайтдан маълумот олинганда манба кўрсатилиши шарт.
Email: admin@islom.uz
Telegram: @portalislomuzadmin_bot
Ўзбекистон, Тошкент, 100185
Сўгалли ота кўчаси, 5-уй
