Инсон нимасига керилади-а?!
Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.
Инсонга маълум коинот, яъни борлиқнинг асосий қисми (72 %) зулмат энергиядан иборат. Бу энергияни ўрганиш, таниш ва таҳлил қилиш усули ҳали кашф этилмагани учун у зулмат, яъни қора энергия деб номланган.
Замонавий илм-фан унинг борлигини ҳисоб-китоб орқали тахмин қилади (балким йўқдир), лекин нима эканлиги ҳақида ҳеч қандай маълумотга эга эмас.
Борлиқнинг яна асосий қисми (23 %) зулмат материясидан иборат. Аммо унинг нима эканлигини билмайди.
Бу массага эга бўлган лекин атом, ион ва протон каби жисмларга ўхшамаган, инсониятга маълум бўлган кузатув ва тадқиқот усуллари билан ўрганиб бўлмайдиган моддадир.
Шундай қилиб, коинотнинг асоси, яъни 96% инсоният учун номаълум, илм-фан учун зулматдир.
Коинотнинг қолган 4% қисми инсон ўрганиши, кузатиши ва устида тажриба ўтказиши мумкин бўлган жисмлар (атом, ион ва б.)дан иборатдир.
Инсоният ўзига маълум бўлган, коинотнинг 4 фоизини ташкил этадиган моддаларнинг аксар қисмига, яъни 96% га абадул-абад етиша олмайди. Яъни, инсоният дунёда энг тез ҳаракатланадиган ёруғлик тезлигида ҳаракат қилганда ҳам, ўзига маълум борлиқнинг 96% га етиб боролмайди.
Нима қолди?
Инсоният ёруғлик тезлигида ҳаракат қилса, бутун борлиқнинг атиги 0.32 фоизини (диаграммадаги соч толасидек қизил чизиқ-чизиқ) ўрганиши, тадқиқ, тажриба қилиши мумкин.
Афсуски, инсоният ёруғлик тезлигида ҳаракат қилолмайди.
У борлиқнинг соч толасидек бўлган қисмида энг кичик заррача бўлган Ер юзидагина сайр қилиши, уни ўрганиши, осмонга эса фақат назар солиши ва у ҳақда тафаккур қилишдан бошқа йўли йўқ.
Коинотнинг заррасичалик келадиган қисми ҳақида мактаб дарслиги даражасида билимга эга бўлган жоҳил мулҳиднинг «илм-фан Аллоҳни инкор қилади» деб қилишига ўласанми?
Юқорида айтганимдек, инсоният ёруғлик тезлигида ҳаракат қилолмайди.
У борлиқнинг ўзига маълум бўлган соч толасидек бўлган қисмида, энг кичик заррача бўлган Ер юзидагина сайр қилиши, уни ўрганиши, у ерда тажриба қилиши мумкин. Осмонга эса фақат назар солиши ва у ҳақда тафаккур қилишдан бошқа йўли йўқ.
Аллоҳ таоло эса:
«Сен: «Ер юзида юриб, У Зот махлуқотларни қандай (ярата) бошлаганига назар солинглар. Сўнгра Аллоҳ охират ҳаётини пайдо қилур. Албатта, Аллоҳ ҳар бир нарсага ўта қодирдир», – деб айт» (Анкабут сураси, 20-оят), дея буюрмоқда.
Ортидан эса: ...«Осмонлару ернинг яратилиши ҳақида тафаккур қиладиларки: «Роббимиз, буни бекорга яратганинг йўқ, Ўзинг поксан, бизни олов азобидан сақлагин» (Олим Имрон сураси, 191-оят) дерлар, деб борлиқ ҳақида тафаккур қилиш кераклигини уқтиради.
Унутманг, илм-фан борлиқнинг заррача қисмини ҳам ҳали кашф қилиб бўлгани йўқ.
Инсон нимасига керилади-а?!
Саид Комил Муҳаммад Карим
© islom.uz 2003-2024.
Барча ҳуқуқлар ҳимояланган. Сайтдан маълумот олинганда манба кўрсатилиши шарт.
Email: admin@islom.uz
Telegram: @portalislomuzadmin_bot
Ўзбекистон, Тошкент, 100185
Сўгалли ота кўчаси, 5-уй
