Ямоқ кўйлакли онамиз
Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.
Пайғамбаримиз соллаллоҳу алайҳи васаллам: «Уч нарсага қасам ичаман. Банданинг моли садақа қилиш билан камаймайди. Кимга бирон зулм етганида сабр қилса, Аллоҳ унинг иззат шарафини оширади. Ким тиланчилик эшигини очса, Аллоҳ унга фақирлик эшигини очади», дедилар.
Имом Термизий ривояти.
Урва ибн Зубайр розияллоҳу анҳу: «Мен Оиша онамиз розияллоҳу анҳонинг 70 минг дирҳам садақа қилганларини кўрдим. Кўйлакларининг ёни эса ямоқли эди» деганлар.
Дирҳам (қадимги кумуш танга) = 2,975 гр ≈ 3 гр.
2,975 граммни 70 мингга кўпайтирилса, 208 250 грамм чиқади.
Маълумки, кумушнинг закот нисоби 595 грамм.
208 250 граммни 595 граммга бўлсак, 350 чиқади. Яъни, Оиша онамиз розияллоҳу анҳо 350 та закот нисобига тенг маблағни садақа қилганлар.
Бугунги кунда 1 грамм кумуш нархи 5787.21 сўм. Шунда 208 250 грамм кумуш нархи 1 205 186 482,5 (бир миллиард икки юз беш миллион бир юз саксон олти минг тўрт юз саксон икки сўм беш тийин) бўлади.
Кумуш турли даврларда турлича нархларда бўлган. Онамиз садақа қилганларида унинг нархи бошқача бўлган бўлиши, юқоридаги ҳисобдан бироз фарқли бўлиши эҳтимоли бор.
Оиша онамиз розияллоҳу анҳо ўзлари ямоқли кийим кийганлари ҳолда шунча маблағни садақа қилган эканлар.
Баъзилар масжидга беш минг сўм берса, имом домла унинг исмини минбардан туриб ўқишларини, «Фалончихон беш минг сўм эҳсон қилибдилар» дейишларини хоҳлайди
Яҳё ибн Муоз раҳимаҳуллоҳ: «Ҳар қандай одамнинг қалбида сахийга муҳаббат, бахилга нафрат бор» деганлар.
Муҳаммад Зеҳний: «Бахил киши ўз мол-мулкининг қоровули ва ўзгаларга қолдирадиган мероснинг хазиначисидир» деганлар.
Муҳаммад Мутаваллий Шаъровий раҳимаҳуллоҳ: «Агар берганингдан кўра олганингда кўпроқ хурсанд бўлсанг, демак, сен дунё аҳлидан экансан. Агар олганингдан кўра берганингда кўпроқ хурсанд бўлсанг, демак, сен охират аҳлидан экансан» деганлар.
Биз берсак хурсанд бўламизми ёки олсакми? Садақа қилайлик! охиратда мукофотини олишга аниқ ишониб садақа берайлик. Биз пулимизни қабримизга олиб кета олмаймиз. Аммо уни ўзимиз учун бошқа замонга юбора оламиз. Бу садақа қилиш орқали бўлади.
Аллоҳ таоло барчамизни садақа берувчилардан айласин, Ўзининг ҳидоятидан айирмасин ва хотимамизни чиройли қилсин!
Нозимжон Ҳошимжон тайёрлади
© islom.uz 2003-2025.
Барча ҳуқуқлар ҳимояланган. Сайтдан маълумот олинганда манба кўрсатилиши шарт.
Email: admin@islom.uz
Telegram: @portalislomuzadmin_bot
Ўзбекистон, Тошкент, 100185
Сўгалли ота кўчаси, 5-уй
