Нега мутакаббирлик қиласан?!
Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.
Аллоҳ таоло Қуръони Каримнинг Наҳл сурасида шундай деб марҳамат қилади:
إِلَٰهُكُمْ إِلَٰهٌ وَاحِدٌ ۚ فَالَّذِينَ لَا يُؤْمِنُونَ بِالْآخِرَةِ قُلُوبُهُم مُّنكِرَةٌ وَهُم مُّسْتَكْبِرُونَ لَا جَرَمَ أَنَّ اللَّهَ يَعْلَمُ مَا يُسِرُّونَ وَمَا يُعْلِنُونَ ۚ إِنَّهُ لَا يُحِبُّ الْمُسْتَكْبِرِينَ
«Илоҳингиз ягона Илоҳдир. Охиратга иймон келтирмайдиганларнинг қалблари инкор қилувчидир, ўзлари эса мутакаббирдирлар. Ҳеч шубҳасиз, Аллоҳ нимани сир тутаётганларини ҳам, нимани ошкор қилаётганларини ҳам биладир. Албатта, У мутакаббирларни суймас»(22-23-оятлар).
Ҳориса ибн Ваҳб розияллоҳу анҳудан ривоят қилинади: «Набий соллаллоҳу алайҳи васаллам: «Сизларга аҳли жаннатнинг хабарини берайми? Ҳар бир заифҳол ва заифҳол саналгандир. Аммо Аллоҳга қасам ичса, У зот унинг қасамини юзага чиқаради.
Сизларга аҳли дўзахнинг хабарини берайми? Ҳар бир қўпол, саркаш ва мутакаббирдир», дедилар».
Икки шайх ва Термизий ривоят қилган.
Ҳой, мансаб эгаси!
Ҳой, баъзи илм эгаси!
Ҳой, мол эгаси!
Ҳой, обрў эгаси!
Нега мутакаббирлик қиласан?!
Аллоҳ кўрсатмасин, агар миянгдаги артерия томирларидан бирида қон қуюлиб, қотиб, тромб ҳосил бўлса, бутунлай хотирангни йўқотиб, охири руҳсиз жасадга айланишинг, яъни вафот этишинг мумкин.
Миядаги томирда тромб ҳосил бўлса, нима бўлади?
• фалажлик;
• мускулларни бошқара олмай қолиш;
• ҳаракат қилолмаслик,;
• томоқ мускулларини бошқара олмаслик натижасида ютиниш, таомни ютишнинг қийинлашиши;
• қабзият;
• доимий бош оғриқ;
• хотиранинг йўқолиши;
• тушуниш, фикрлашнинг қийинлашиши;
• ўзини танимай қолиши;
• оғиз мускулларини бошқара олмаслик;
• гапиришга қийналиш;
• ўқиш, ёзишда муаммоларга дуч келиш ва гапни тушунмаслик.
Биргина нуқтадек қотган қон сабабли қандай аҳволга тушишимизни ўйлаб кўринг!
Унутманг, сиз ҳам, мен ҳам Аллоҳ таолонинг қабзасидамиз. Унинг лутфи, ҳилми остидамиз.
Агар Аллоҳ таолонинг раҳмати бўлмаганида, мен ҳам, сиз ҳам, барчамиз ҳам йўқ бўлардик!
Шундай экан, ожизлигимизни, бир кун ўлишимизни унутмайлик!
Аллоҳ таоло барчамизни Ўзининг ҳидоятидан айирмасин ва хотимамизни чиройли қилсин!
Манбалар:
Islom.uz
Quran.ksu.edu.sa
Нозимжон Ҳошимжон тайёрлади
© islom.uz 2003-2024.
Барча ҳуқуқлар ҳимояланган. Сайтдан маълумот олинганда манба кўрсатилиши шарт.
Email: admin@islom.uz
Telegram: @portalislomuzadmin_bot
Ўзбекистон, Тошкент, 100185
Сўгалли ота кўчаси, 5-уй
