ЭРКАК КИШИ ҚАЧОН ЙИҒЛАЙДИ?
Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.
Бир донишманддан «Эркак киши ҳам йиғлайдими?» деб сўрашди.
«Ҳа, йиғлайди», деди донишманд.
«Қачон йиғлайди?» деб сўрашган эди, донишманд шундай деди:
«Эркак киши онаси вафот этганда йиғлайди.
Эркак киши отасини йўқотганда йиғлайди.
Эркак киши фарзанди касал бўлиб қолганда йиғлайди.
Эркак киши қизини турмушга узатаётганда йиғлайди.
Эркак киши ўғли эътироз билдирганда, итоатсизлик қилганда, ўзини катта олганда, қўполлик қилганда, бир сўз билан бўлса ҳам қалбига озор етказганда йиғлайди.
Эркак киши зулмга учраганида, сиқилганида, фарзандидан ҳурматсизлик кўрганда йиғлайди.
Эркак киши оиласини боқа олмай қолганда, фарзандининг қўлига қараб қолганида йиғлайди.
Эркак киши Ватанини соғинганда, яқинларидан узоқда бўлганида йиғлайди.
Эркак киши йиғлайди, лекин ҳамманинг олдида эмас, балки қоронғи жойда, ёмғир остида сайр қилаётганда, ёстиққа бош қўйганида йиғлайди.
Ҳа, эркак киши атрофдагиларга, яқинларига сездирмай йиғлайди. Эркакнинг кўз ёшлари ҳамма кўриниб, кўзидан чиқиб, яноқларига оқмайди, балки қалбидан отилиб чиқиб, қалбига томади. Бунинг асари эса эркакнинг хўрсинишларида, кўз қарашларида, юзини босган ажинларда, сочига оралаган оқ толаларда, қўлидаги титроқларда акс этади.
Эркак киши мана шундай йиғлайди».
Шу ўринда муҳим маълумотни айтиб ўтсак:
Мўмин-мусулмоннинг кўзидан томадиган энг афзал ёш – Аллоҳдан қўрқиб тўкилган кўз ёшидир.
Абу Умома Судай ибн Ажлон Боҳилий розияллоҳу анҳудан ривоят қилинади:
«Расулуллоҳ соллаллоҳу алайҳи васаллам шундай деганлар: «Аллоҳ таолога энг маҳбуб нарса – икки томчи ва икки оёқ изидир: Аллоҳдан қўрқиб тўкилган кўз ёши томчиси ва Аллоҳ йўлида тўкилган қон томчиси ҳамда Аллоҳ йўлида босилган қадам изи ва Аллоҳнинг фарзини адо этиш учун босилган қадам изи».
Имом Термизий ривояти.
Аллоҳ таоло барчамизни Ўзидан қўрқиб йиғлайдиган бандаларидан қилсин!
Манба: «Ҳар куни сизни қизиқтирадиган маълумот» саҳифасидан
Арабчадан Нозимжон Ҳошимжон таржимаси
Хуршид Маъруф тайёрлади
© islom.uz 2003-2024.
Барча ҳуқуқлар ҳимояланган. Сайтдан маълумот олинганда манба кўрсатилиши шарт.
Email: admin@islom.uz
Telegram: @portalislomuzadmin_bot
Ўзбекистон, Тошкент, 100185
Сўгалли ота кўчаси, 5-уй
