Болаларни Рамазонга ўргатиш учун 15 тавсия
Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.
1) Рамазон ойи фарзандларимизга рўза, намоз ва Қуръон тиловати каби ибодатларни ўргатиш учун жуда қулай фурсатдир.
2) Болалар билан кўпроқ муомала қилайлик, чунки улар кўрганларини қилишга ошиқадилар.
3) Ҳар бир нарсани босқичма-босқич ўргатиб бориш керак. Ислом таълимоти ҳам шудир.
4) Боланинг фаҳми, зеҳни ўсишда, шунинг учун у сизнинг кўрсатмаларингизга амал қилади, сиз билан бирга рўза тутади.
5) Рамазонда хонадондаги ҳаёт тарзи, овқатланиш ва ухлаш вақтлари ўзгаради. Шунинг учун фарзандингиз ҳам шу тартибга мослашсин. Уларга тегишли вазифаларни белгилаб беринг.
6) Бола катталар айтган ишни бажаргани билан фахрланади.
7) 6-12 ёшгача бўлган болаларнинг Рамазондаги ҳолатлари:
· Рўза тутишга жисмоний тайёр.
· Талабни босқичма-босқич кўтариб борган афзал.
· Бола отасига қаттиқ тақлид қилади.
· Оиласининг муҳаббатига сазовор бўлиш учун ҳам рўза тутади.
· Катталар мени рўза тутганим учун мақтасин деб ҳам рўза тутади.
8) Рўзада болалар билан муносабатда тавсия қилинмаган ишлар:
· Мажбурлаб рўза туттириш.
· Рўзадорлигига бепарво бўлиш.
· Бошқалар рўзани сендан яхшироқ тутяпти деб танбеҳ бериш.
· Рўза тутмагани учун жазолаш.
· Рўза ҳақида маълумотсиз қолдириш.
9) Рамазонда болаларга ўргатиш лозим бўлган ишлар:
· Сура, дуо ва зикрларни ёдлаш.
· Болага у тушунадиган тилда маълумот беринг, қанча савол берса ҳам малолланманг.
· Бола билан доимо хушчақчақ бўлинг. Вазифаларини бажарганида мукофотлаш ёдингиздан чиқмасин.
· Доимо ҳолидан хабардор бўлиб туринг.
· Ўзингиз унга яхши ўрнак бўлинг.
10) Рамазонда болаларга айтиш тавсия қилинган сўзлар:
· «Мен сен билан фахрланаман!» дейишдан чарчаманг.
· «Машааллоҳ, катталардек рўза тутяпти! Менинг полвоним!»
· «Намозларини ҳам қолдирмай ўқиётган арслонимдан ўргилай».
· «Бу ўғлимни ҳамма мақтаяпти, ҳаммага ўрнак бўляпти».
· «Рўза тутганингда яна ҳам ширин бўлиб кетасан-да, болажоним».
11) Фарзандларингиз билан Рамазонда қиладиган ишларнинг рўйхатини тузинг:
· Қариндошларни зиёрат қилиш.
· Рўзадорларга ифтор қилиб бериш.
· Қуръон тиловат қилиш.
· Хайр-эҳсон қилиш.
· Беморларни зиёрат қилиш ва ҳоказо
12) Болалар бировга ёрдами тегишини жуда яхши кўради. Шунинг учун уларга баъзи бир енгил ишларни юклаб туринг.
13) Болаларни бездирадиган амаллар:
· Рўза тутмагани учун жазоламанг.
· Тутган рўзасини бошқаларники билан солиштириб, кўнглини ранжитманг.
· «Сен энди катта бўлиб қолдинг, рўза тутишинг керак», деб мажбурламанг.
· Рўза ҳақидаги саволларини жавобсиз қодирманг.
14) Шуни яхши билингки, болалар рўза тутишга мукаллаф эмас.
15) Қизиқтириб, мақтаб, боланинг руҳини кўтариб туринг.
Хайруллоҳ Ҳабибуллоҳ тайёрлади.
© islom.uz 2003-2024.
Барча ҳуқуқлар ҳимояланган. Сайтдан маълумот олинганда манба кўрсатилиши шарт.
Email: admin@islom.uz
Telegram: @portalislomuzadmin_bot
Ўзбекистон, Тошкент, 100185
Сўгалли ота кўчаси, 5-уй
