Соч ва тирноқ қанча ўстирилади?
Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.
Кўча-кўйда йигитларнинг соч ва тирноқларини узун қилиб ўстириб юришганини ёки аксинча қиз-аёлларнинг сочи жуда калталигини кўриб қоламиз. Бу борада динимизнинг талаблари қандай?
ЖАВОБ: Бу маънода мукаммал динимиз Исломнинг ўзига яраша кўрсатмалари бор. Инсоннинг ички олами каби ташқи қиёфаси ҳам гўзал бўлиши Исломда талаб қилинган. Шунинг учун ҳар бир мусулмон фарзанди ўзининг тозалиги, поклиги, гўзаллиги ҳақида қайғуриши лозим. Эркак ва аёл ҳафтада бир марта тирноқларини олиши керак. Уни узун қилиб ўстириб юриш Ислом одобига ҳам, Ислом кўрсатмасига ҳам, Суннатга ҳам мутлақо зид иш бўлади.
Шу каби сочни эҳтиром (парвариш) қилиш деганда уни тоза тутиш, тараш, авайлаш, гўзал қилиб юриш маъноси тушунилади. Сочнинг узун-қисқалиги тўғрисида гапирадиган бўлсак, эркак кишининг сочи эркакникига ўхшаган бўлиши лозим. Қисқа бўлиши тарғиб қилинишининг сабаби шуки, ғусл пайтида бирор тола тагига сув тегмай қолса, ўша жой жаҳаннам оташида куйиши ҳақида ҳадислар бор. Бироз ўстириш эса Пайғамбаримиз соллаллоҳу алайҳи васалламнинг сочлари ўсиб, қулоқлари юмшоғидан бироз пастга тушиб тургани тўғрисидаги ривоятларга асосланган.
Аёлларнинг сочлари қадимдан узун бўлган. Шунинг учун уларга баъзи вақтда, ҳатто ғусл пайтида ҳам соч ўримларини ечмасликка рухсат этиб, шариат маълум енгилликлар берган. Лекин аёллар билан эркакларнинг сочлари кўриниши бир-бирига ўхшаш бўлмаслиги керак. Яъни, аёл сочини эркакларникига ўхшатиб олмаслиги ва эркак киши сочини аёлларникига ўхшатмаслиги керак. Бу ҳаром нарса, бу нарсага мутлақо йўл қўймаслик лозим (Аллоҳ билувчидир).
© islom.uz 2003-2025.
Барча ҳуқуқлар ҳимояланган. Сайтдан маълумот олинганда манба кўрсатилиши шарт.
Email: admin@islom.uz
Telegram: @portalislomuzadmin_bot
Ўзбекистон, Тошкент, 100185
Сўгалли ота кўчаси, 5-уй
