Туркиялик велосипедчи ҳаж сафарига отланди
26 ёшли туркиялик велосипедчи Бурак Ўзтурк 2025 йилда ҳаж ибодатини адо этиш учун Германиянинг Штутгарт шаҳридан Саудия Арабистонининг Макка шаҳрига бўлган зиёратини бошлади. Бу ҳақда theislamicinformation.com сайти хабар берди.
Ўзтурк шу йил июнь ойида ҳаж ибодати бошланишидан аввал муқаддас шаҳарга етиб боришни мақсад қилган, у ўнта мамлакат бўйлаб саёҳат қилиш режасини тузган.
Велосипедчи ижтимоий тармоқларда мунтазам равишда ўз саргузаштлари билан ўртоқлашмоқда. Бу эса издошларига унинг турли хил ландшафтлар ва маданиятлар тараққиётига гувоҳ бўлиш имконини беради. Манзилга аниқ келиш санаси белгиланмаган бўлса-да, Ўзтурк Маккага ҳаж маросимлари бошланишидан анча олдин етиб боришига ишонч билдирган.
Ўзтуркнинг саёҳати Австрия, Словения, Хорватия, Сербия, Косово, Шимолий Македония, Греция ва ота-боболари ватани Туркияни ўз ичига олади, кейин Сурия ва Иордания орқали давом этиб, ниҳоят Саудия Арабистонига етиб келади.
У бу саёҳатни икки йил аввал режалаштирган, аммо оилавий шароит туфайли кейинга қолдиришга мажбур бўлган. Бурак Ўзтурк ўз йўналиши бўйича ҳар бир мамлакат орқали хавфсиз ўтишни таъминлаш мақсадида визалар ва рухсатномаларни олиш каби барча керакли тайёргарликни кўрган.
Саудия Арабистони Ҳаж ва Умра вазирлиги бу йилги ҳаж ибодатига ташриф буюрувчилар учун аллақачон рўйхатга олишни бошлаб юборган.
Ўтган йили ҳаж ибодатини адо этиш учун тахминан 1,8 миллион мусулмон, шулардан 1,6 миллиони халқаро зиёратчилар экани маълум қилинган.
© islom.uz 2003-2025.
Барча ҳуқуқлар ҳимояланган. Сайтдан маълумот олинганда манба кўрсатилиши шарт.
Email: admin@islom.uz
Telegram: @portalislomuzadmin_bot
Ўзбекистон, Тошкент, 100185
Сўгалли ота кўчаси, 5-уй
