Ҳиндистонлик мусулмон Макка шаҳрига пиёда етиб келди
Ҳиндистонлик мусулмон Шиҳоб Чоттур ҳаж сафарини бажаришга интилиб, деярли 8640 км масофани пиёда босиб ўтиб Макка шаҳрига етиб келди. Бу ҳақда aboutislam.net сайти хабар берди.
Siasat нашрининг хабар беришича, Чоттур авваллари Маккага пиёда саёҳат қилган мусулмонлар ҳақида кўплаб ҳикояларни эшитган.
У ўтган йили июнь ойида машаққатли саёҳатни пиёда бошлаб, Ҳиндистон, Покистон, Эрон, Ироқ ва Қувайтни кесиб ўтиб, ниҳоят 7 июнь куни Саудия Арабистонига 12 ой 5 кун ичида етиб келди.
У Саудия Арабистонининг Al-Ekhbariya телеканалига берган интервьюсида шундай деди: «Яхши ният қилган ҳар бир киши ўз мақсадига эриша олади».
Бу йиллик саёҳат у учун осон кечмади. Сентябрь ойида у Панжоб штатининг Вагаҳ чегарасига етиб келганида, визаси йўқлиги сабабли Покистон расмийлари уни тўхтатиб қўйишади.
2023 йил февраль ойида виза олгач, Покистонга кириб, Саудия Арабистонига бўлган сафарини давом эттиришга муваффақ бўлди.
У саёҳати давомида дуч келган қийинчиликлари орасида Эрондаги совуқ ҳаво ва баъзи йиртқич ҳайвонларнинг борлиги уни ҳавотирга солган.
Ўтган ой Саудия Арабистонига кириб келиб, Маккага жўнаб кетишдан аввал Мадинага йўл олади. Мадина ва Макка орасидаги 440 километр масофани тўққиз кунда босиб ўтади.
Яна шунга ўхшаш ҳаж қилиш билан боғлиқ қизиқ маълумотни келтириб ўтамиз.
Британиялик Фарид Феядий Ғарб ОАВларида Ислом ҳақидаги нотўғри фикрларни йўқ қилиш учун 2020 йилда Лондондан ҳаж ибодатини адо қилиш ниятида шундай саёҳатга отланган эди.
Шунингдек, 2022 йил июнь ойида индонезиялик ёш Муҳаммад Фаузан велосипедида қарийб 5000 километр масофани босиб ўтиб, Маккага етиб келган.
© islom.uz 2003-2024.
Барча ҳуқуқлар ҳимояланган. Сайтдан маълумот олинганда манба кўрсатилиши шарт.
Email: admin@islom.uz
Telegram: @portalislomuzadmin_bot
Ўзбекистон, Тошкент, 100185
Сўгалли ота кўчаси, 5-уй
