Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.

«Радд» луғатда «қайтариш» маъносини англатади.

Мерос илми истилоҳида эса авлнинг тескарисини билдиради. Бунда насибалар улушлардан ортиб қолиб, асабалар бўлмаганлиги учун ортган мол фарз соҳибларига уларнинг улушларига қараб, яна қайта тақсимланади. Фақатгина эр ва хотинга қайтарилмайди. Чунки эр ва хотиннинг бир-биридан мерос олиши насаб туфайли эмас, балки сабаб туфайлидир. Шунинг учун улардан ҳар бири фақат ўз улушига ҳақдор бўлади, холос. Ундан ортиқ нарсага ҳақдор бўла олмайди. Эр-хотинлик алоқаси ўлим билан узилади.

Шунинг учун ҳам мерос илми уламолари раддни қуйидагича таърифлайдилар:

«Радд – насабий фарз соҳибларидан ортиб қолган нарсани асаба бўлмаганлиги туфайли яна уларга улушларига биноан қайта тақсимлашдир».

Мерос қуйидаги фарз соҳибларига радд қилинади (қайтарилади):

1. Она.

2. Момо.

3. Қиз.

4. Ўғилнинг қизи.

5. Туғишган опа-сингиллар.

6. Ота бир опа-сингиллар.

7. Онанинг болалари.

«Ҳадис ва ҳаёт» китобидан