Бузишга яроқли инсонлар қуришга қодир эмаслар
Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.
Султон Сулаймон Қонуний эски саройларидан бирини бузиб уни янгидан қурмоқчи бўлди. Мамлакатдаги энг моҳир муҳандисни суриштирди. Унга муҳандис-меъмор Синон бу ишда моҳир эканлигини айтишди. Султон муҳандисни топдириб унга мақсадини айтди. Меъмор Синон ушбу вазифани гарданига олиб тезлик билан ишга киришди.
Шу ергача масала табиий кўринади. Ғайритабиийсига келсак, султон Сулаймон қурилишнинг икир-чикиригача ўзи назорат қилиб борди. У меъмор Синоннинг саройни бузишда ишлатган ишчиларни янги саройни қуришда ишлатмаганлигини кўрди. У меъморни чақиртириб сўради:
- Нега эски саройни бузишда ишлатган ишчиларни янги саройни қуришда ишлатмадинг?
Меъмор жавоб берди:
- Султон ҳазратлари! Бузишга яроқли инсонлар қуришга яроқли бўлишмайди!
Биродарлар! Мана шуни ўзимизга қоида-асос қилиб олишимиз лозим. Бузишга яроқли инсонлар қуришга қодир эмаслар.
Сизга жароҳат етказганлар сизни даволашга қодир эмаслар. Дардингизга давони сизни жароҳатлаганлар ҳузуридан қидирманг.
Кўзингизни ёшлатганлар кўз ёшингизни артишга қодир эмаслар.
Юзингизга тарсаки урганлар сизни ўша қўллари билан қучоқлашга қодир эмаслар.
Қалбингизни жароҳатлаганлар кўнглингизни олишга қодир эмаслар.
Инсонларга қўшимча фурсат беришдан тийилинг. Баъзи инсонлардан яхшилик кутмаслик ҳам етуклик ҳисобланади.
Қалби қаттиқ бўлинг, демоқчи эмасман. Мен юмшоқликни севаман ва унга даъват қиламан. Жароҳатларини маҳкам ушлаб инсонларни кечирадиганлар мени асир қилади. Мен айтмоқчи бўлган гап шуки, инсонларнинг қўлларида ўйинчоқ бўлиб қолмайлик. Бизни соддалигимиздан инсонлар кулишмасин!
Ҳаммамиз ҳам хато қиламиз, ёмонлик қилиб қўямиз. Бошқалар ҳам хато қилганимизда кечиришлари учун кечиримли бўлишга эҳтиёжимиз бор.
Ортидан узр сўраладиган, кўнгил олинадиган, силанадиган, кўз ёши артиладиган ўткинчи хато бу бошқа нарса.
Ҳукумат бошқарувида ҳам бу фикрдан фойдаланса бўлади. Вайрон қилганларни ҳадеб мансаб-вазифага қўявермаслик керак. Миллат мулкига зарар етказаётганларни, ўғирлаётганларни мансаблардан четлаштириш лозим. Улар вайрон қилишдан бошқа нарсани билишмайди.
Ёмонликдан доимий эҳтиёт бўлмоғимиз лозим!
Абдулқодир Полвонов тайёрлади
© islom.uz 2003-2024.
Барча ҳуқуқлар ҳимояланган. Сайтдан маълумот олинганда манба кўрсатилиши шарт.
Email: admin@islom.uz
Telegram: @portalislomuzadmin_bot
Ўзбекистон, Тошкент, 100185
Сўгалли ота кўчаси, 5-уй
