Сенегалдаги «Илоҳиёт» масжиди

Сенегал пойтахти Даккарда океан бўйида жойлашган «Илоҳиёт» масжиди (Mosquée de la Divinité) ҳақида эшитганмисиз? Ушбу гўзал манзарага эга бўлган масжид шаҳарнинг тимсолларидан бири ҳисобланади.

Масжид Даккар шаҳрининг Атлантика океани соҳилидаги балиқчи қишлоғи яқинида, денгиз йўли бўйида жойлашган.

Океан манзарасидаги жойлашуви ва олдида саф тортган кемалар бу масжидни шаҳар манзарасининг энг эсда қоларли масканларидан бирига айлантирган.

Машҳур сенегаллик меъмор шайх Нгом томонидан лойиҳаланган масжид оқ ранг билан уйғунлашган. Масжидда 45 метрлик икки бурчакли минора қад ростлаган.

Халқ орасида ушбу масжид «Раббоний масжид» номи билан ҳам танилган. 1992 йил масжиднинг қурилиш ишлари бошланган. Қурилиш жараёни беш йилу беш ой давом этиб, 1997 йилда якунланган. Шундан бери масжид эшиклари мусулмонлар учун очиқ.

Муҳаммад Набий Гуэенинг айтишича, бу масжиднинг ўзига хос анъанаси бор экан. Масжидда жума намози оқ кийимда адо этилиши тавсия этилган экан. Шу сабабли бу масжидда жума намозини ўқимоқчи бўлган ҳар бир киши оқ кафтан (миллий либос) кийиши керак экан. Кафтани йўқлар учун эса масжидга киришида вақтинчалик миллий либос берилар экан.

Масжид жамоасидан бири Абдуллоҳ Диян шундай дейди:

«Узоқда яшасам ҳам ҳар жума оқ кафтанимни кийиб, бу ерга келишни яхши кўраман. Бутун жамоани оқ кийимда кўриш менга катта ҳузур бағишлайди. Даккарни зиёрат қилишга келган дўстларимни ҳам жума куни бу масжидга олиб келаман. Бу жой меъморчилиги жиҳатидан ўзига хос масжиддир».