09. Бошланғич Ҳанафий фиқҳи | 6-дарс

Таҳорат қисмлари

Таҳорат уч қисмдан иборат:

1. Таҳоратсиз кишига нафл бўлса ҳам намоз ўқиши учун, жаноза намозига, тиловат саждасига, Қуръонни ушлашга, бир оятни бўлса ҳам ушлашга таҳорат қилиш фарз.

2. Каъбанинг атрофида тавоф учун вожиб.

3. Таҳорат билан ухлашга, ундан уйғонганда, унда бардавом бўлишга, таҳорат устига таҳорат учун, ғийбат, ёлғон, чақимчилик ва ҳар бир хато (гуноҳдан)дан кейин, шеър айтгандан кейин, намоздан ташқарида қаҳ-қаҳа отиб кулгандан кейин, маййит ювгандан ва уни кўтаргандан кейин, ҳар намознинг вақтига, жунублик ғуслидан олдин, жунуб бўлган ҳолда таом ейиши, сув ичиши, ухлаши ёки қайта жимоъ қилишидан олдин, ғазаб келганда, Қуръон (тиловатига), ҳадис (ўқиш), уни ривоят қилишга, илм ўқишга, азон айтишга, иқомат айтишга, хутбага, Набий соллалоҳу алайҳи васалламни зиёратларига, арофатда туришга, Сафо Марво орасида юришга, туя гўштини егандан сўнг, уламоларнинг хилофларидан чиқиш учун, масалан аёлни ушласа, таҳорат қилиш мандубдир.

«Нурул ийзоҳ» китоби асосида

Фозилжон Абдулқайюм тайёрлади