1441 йил 26 жумадул аввал | 2020 йил 21 январь, сешанба
Минтақа:
ЎЗ UZ RU EN AR
Қуръон

Аллоҳнинг неъматига куфр келтирадиларми?!

21:14 / 12.04.2018 1749 pdf Ўқиш режими + -

Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.

Аллоҳ сизлар учун ўзларингиздан жуфтлар қилди ва сизларга жуфтларингиздан болалар ва набиралар қилди ҳамда сизларга пок ризқларни берди. Ботилга иймон келтирадилар-у, Аллоҳнинг неъматига куфр келтирадиларми?!

Ояти каримада жуфти ҳалол, фарзанд ва набира каби неъматлар ҳақида сўз кетмоқда.

Бу орқали ўша улуғ неъматларни беришга ягона Аллоҳнинг Ўзи ҳақли экани таъкидланади. Шунингдек, Аллоҳ таоло мазкур неъматлардан баҳраманд бўлган бандаларнинг ягона илоҳи – маъбуди бўлишга ҳам ҳақли эканига ишора қилинади.

«Аллоҳ сизлар учун ўзларингиздан жуфтлар қилди…»

Аллоҳ сизларни эр-хотин бўлиб, жуфт бўлиб яшайдиган қилди. Ўша жуфти ҳалолни ўзингиздан яратди. Эрни ҳам, хотинни ҳам бир жинсдан қилди. Бирини юқори, бошқасини паст жинсдан яратгани йўқ. Балки иккиси ҳам инсон, иккиси ҳам Аллоҳнинг бандаси ўлароқ яратилди. Бу улкан неъматдир. Эркаклар учун аёлларни ёки аёллар учун эркакларни яратиб бермаганида, нима бўлар эди? Эркакларга эркаклик, аёлларга аёллик хусусиятини берган ким? Уларни бир оилада яшаб, фарзанд кўриш бахтига муяссар қилган ким?

«...ва сизларга жуфтларингиздан болалар ва набиралар қилди…»

Аллоҳнинг бандасига фарзанд бериши улкан неъматдир. Шунингдек, жигаргўшасининг фарзандини кўриш, яъни набирали бўлиш ҳам улкан неъмат ҳисобланади.

Инсонга болани ва набирани фақат Аллоҳ таологина беради. Инсоннинг ўзи бола ёки набирани хоҳлаган пайтида яратиб олади, деган гапнинг мантиқсизлигини ҳеч бир инсон, ҳатто мушрику кофирлар ҳам инкор қилмайдилар. Бугунги кунда сунъий равишда ҳомиладор бўлаётганлар эса Аллоҳ яратиб қўйган қонун-қоидалардан ва воситалардан фойдаланмоқдалар, холос.

Аллоҳ инсонни, аввало, жонсиз тупроқдан яратди. Кейин эса нутфа (сперма) орқали кўпайишини қонунлаштириб қўйди. Фақат бу кўпайиш ҳалол-пок йўл билан бўлиши шартлигини Ўз Китобида алоҳида таъкидлаб ҳам қўйди. Демак, инсон ўзига ҳалол жуфт, бола ва набиралар берган Аллоҳ таолога иймон келтириб, Унгагина ибодат қилиб юрмоғи лозим. Акс ҳолда ношукрлик бўлади.

«...ҳамда сизларга пок ризқларни берди».

Аллоҳ инсонга покиза ризқ берувчи ягона Зотдир. Ундан бошқа ризқ берувчи зот йўқ. Демак, бу ўринда ҳам инсон Аллоҳ таолога иймон келтириб, Унгагина ибодат қилмоғи лозим. Лекин одамларнинг кўпи, бунинг тескариси ўлароқ, Аллоҳга куфр ва ширк келтирадилар, исён ва гуноҳ қиладилар. Аллоҳнинг таълимотларига амал этмасдан, Унинг айтганларини бажармасдан, Унга турли бўлмағур буту санамни, табиатдаги мавжудотлар, ҳайвонотлар, одамлар ва тузумларни шерик этадилар. Нима учун шундай қиладилар?!

«Ботилга иймон келтирадилар-у, Аллоҳнинг неъматига куфр келтирадиларми?»

 

Шайх Муҳаммад Содиқ Муҳаммад Юсуф

  (Тафсири Ҳилол китобидан)



Муаллиф
islom.uz
Мавзуга оид мақолалар
Расулуллоҳ соллаллоҳу алайҳи васаллам Қуръони Каримни Аллоҳ таолонинг ҳузурида қандоқ бўлса ўшандоқ ҳолида Жиброил алайҳиссаломдан қабул қилиб олганлар. У давоми...

2024 05:00 / 19.01.2017
3. .Муҳаммад Қуръонни одамлардан ўрганган,, деган даъво.Араб мушрикларидан бир гуруҳи Қуръонни Набий соллаллоҳу алайҳи васалламга инсонлардан бири ўргатишини давоми...

1818 16:40 / 11.02.2019
3. Эй одамлар Аллоҳнинг сизга берган неъматларини эсланг Аллоҳдан бошқа сизларга осмон ва ердан ризқ берадиган холиқ борми Ундан ўзга ибодатга сазовор зот йўқ. давоми...

1575 05:00 / 23.01.2017
Юқорида баён қилинган ваҳий ҳолатини тушуниб етмаслик кўп нарсаларга тўсиқ бўлиши турган гап. Бу улкан ҳақиқатни ўрганмай туриб, ўзича .хулоса чиқариш, ва бу давоми...

2126 14:45 / 14.01.2019
Аудиолар

29472 11:58 / 10.10.2018
«Ҳилол» журнали
Китоблар
Топ рейтинг www.uz Openstat