Нега муслима ғайридийн билан турмуш қуриши мумкин эмас
Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.
Муслима аёл фақат мусулмон эркак билангина турмуш қуриши мумкин. Ғайридийн эркакка эрга тегиш муслима аёлга қаттиқ ман қилинган. Бу борада эркак аҳли китоб бўлса ҳам бўлмайди. Мусулмон эркак масиҳия ёки яҳудия аёлга уйланса бўлади. Аммо муслима аёл масиҳий ёки яҳудий эркакка турмушга чиқиши мумкин эмас. «Нима учун?» деган савол пайдо бўлиши турган гап. Жавоб қуйидагича:
Ислом ўзидан олдинги дийнларни тан олади. Жумладан, масиҳий ва яҳудий дийнларини ҳам тан олади. Масиҳий ва яҳудий дийнлари эса Ислом дийнини тан олмайдилар.
Шу асосда масиҳий ёки яҳудий аёлга уйланган мусулмон эркак ўз хотинининг дийнини тан олади ва ҳурмат қилади. Шунингдек, унинг илоҳий китоби – Инжил ёки Тавротни, Пайғамбари Ийсо алайҳиссалом ёки Мусо алайҳиссаломларни ҳам тан олади ва ҳурмат қилади.
Масиҳий ёки яҳудий эркак эса Ислом дийнини ҳам, Қуръони Каримни ҳам тан олмайди, ҳурмат ҳам қилмайди, аксинча, ҳақорат қилади. Муҳаммад соллаллоҳу алайҳи васалламни ҳам тан олмайди, ҳурмат қилмайди. Аксинча, алдамчи, фирибгар ва хотинбоз, деб ҳақорат қилади. Бундай ҳолда муслима аёл у билан қандай қилиб турмуш қила олади?
Қолаверса, Ислом масиҳий ва яҳудий аёлга мусулмон эркак билан яшаш давомида унинг барча ҳуқуқларини ҳимоя қилувчи, дийни, эрки, моли ва бошқа нарсаларнинг дахлсизлигини таъминловчи очиқ-ойдин қонун-қоидаларни жорий қилиб қўйган.
Масиҳий ва яҳудий дийнларида эса бу нарсалар ҳақида бир оғиз ҳам сўз йўқ. Бундай ҳолда муслима аёлни қандай қилиб масиҳий ёки яҳудий эркакнинг қўлига топшириш мумкин?
Шайх Муҳаммад Содиқ Муҳаммад Юсуф
(Ҳадис ва ҳаёт китобидан)
© islom.uz 2003-2025.
Барча ҳуқуқлар ҳимояланган. Сайтдан маълумот олинганда манба кўрсатилиши шарт.
Email: admin@islom.uz
Telegram: @portalislomuzadmin_bot
Ўзбекистон, Тошкент, 100185
Сўгалли ота кўчаси, 5-уй
