Юсуф алайҳиссаломнинг шукрлари
Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.
Падари бузрукворим қоддасаллоҳу сирроҳ дер эдилар: «Юсуф алайҳиссаломнинг қиссаларини ҳар бир мусулмон билади, қандай қилиб қудуққа ташландилар, қул қилиндилар, зиндонга солиндилар, узоқ муддат ота-онадан жудо бўлдилар. Ота ўғил учун йиғлади. Ўғил ота учун йиғлади. Анча йилдан кейин улар Мисрда учрашдилар, қарангки, бир ўғил шу тарзда қудуққа ташланган, қул қилинган, зиндонга солинган, фитналарга мубтало қилинган бўлса-да, бир неча йилдан кейин отаси билан учрашганида, ўша даврда етган мусибат ва ғамларни гапириш ўрнига, оталарига бошқа гапни айтдилар. Уни Қуръони Карим зикр қилган:
«...Дарҳақиқат, У (Аллоҳ) менга яхшилик қилди. Мени қамоқдан чиқарди...». (Юсуф сураси, 100-оят).
Яъни, Аллоҳ таоло мени зиндондан чиқариб, менга қанчалар яхшилик қилди. У киши зиндонга тушганларини зикр қилмадилар. Балки, мени зиндондан чиқариб, менга кўп яхшилик қилди, дедилар.
Ортидан яна шундай дедилар: «...ва сизларни биёбондан олиб келди» (Юсуф сураси, 100-оят).
Яъни, сизларга ота-онамга, опа-сингил ва ака-укаларимга Аллоҳ таоло жуда кўп яхшилик қилди, уларни биёбондан келтириб, мен билан учраштирди, дедилар. Жудоликни эса зикр қилмадилар.
Кейин бундай дедилар: «Шайтон мен билан акаларимнинг орасини бузгандан сўнг...». (Юсуф сураси, 100-оят).
Яъни, шайтон мен билан акаларим ўртасида бир муаммони пайдо қилган эди, деб олдин содир бўлган воқеаларни, акаларининг зулмларини шайтонга юкладилар. Шундай қилиб, Ҳазрати Юсуф алайҳиссалом барча мусибат ва қийинчиликларни қўйиб, Аллоҳ таолонинг неъматларини зикр қилдилар. Шукр қилувчи бандаларнинг йўли айнан шудир».
«Насиҳатлар гулдастаси» китобидан
Ўзбекистон Республикаси Дин ишлари бўйича қўмитанинг 2022 йил 4 апрелдаги 02-07/ 2234-рақамли ва 2023 йил 23 мартдаги 03-07/ 1912-рақамли хулосалари асосида тайёрланди.
© islom.uz 2003-2025.
Барча ҳуқуқлар ҳимояланган. Сайтдан маълумот олинганда манба кўрсатилиши шарт.
Email: admin@islom.uz
Telegram: @portalislomuzadmin_bot
Ўзбекистон, Тошкент, 100185
Сўгалли ота кўчаси, 5-уй
