96 ёшли қория Танозур бинт Муҳаммад Мустафо Нажулий
Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.
Фазилатли шайха Танозур бинт Нажулий 1924 йил Мисрнинг ғарбида жойлашган Саманнуд вилоятига қарашли Носирия қишлоғида, ҳозирда ўзи яшаб турган кулбада таваллуд топган. Ёш қизалоқлик пайтида қизамиқ касали оқибатида кўзлари кўрмай қолган. Дастлаб Абдуллатиф Абу Солиҳда Қуръони Каримдан таълим олади, бироқ тажвидсиз ўрганади. Кейин шайх Абу Ҳалованинг ҳузурига бориб, 15 йил унинг ҳузурида илм таҳсил қилади: тажвид илмини пухта ўзлаштириш билан бирга, етти машҳур қироатни Юнус сурасигача ўқиб беради. Сўнг шайх Абдулвожид ҳузурига бориб, Шотибий тариқида етти қироатдан таълим олади ва «Ад-Дурра» китоби асосида қолган уч қироатни Тавба сурасигача шайхига топширади.
Шайха Танозур қўшнисига турмушга чиқиб, тўрт фарзанд кўради.
Умрини Қуръон таълимига бағишлаган шайха Танозур зоҳирий кўзлари юмуқ бўлса-да, қалб кўзлари билан назар соладиган басийратли аёл эди. У ниҳоятда тавозули, кичиккина жуссаси сабру матонатга тўла, тақвою ибодатда пешқадам, иффатини кўз қорачиғидек асраган қория эди. Кўзлари ожиз бўлишига қарамай, ҳамиша ҳаракатчан, ҳушёр, охирги кунларигача ақлан тетик ҳолатда, ўрганган қироатларини тўлиқ ёдда сақлаганича Қуръон таълими билан машғул бўлди.
У туну кун тинмай аёлларга таълим бериш билан банд бўлар, остонаси толибалар билан ҳамиша гавжум эди.
Шайх Яҳё Ғавсоний ўз сафарлари асносида шайха Танозурнинг зиёратига бориб, унга Фотиҳа сурасини ўқиб бериб, дуою ижозалар олган.
Шайха Танозур 2021 йил 9 январ куни вафот этди. Аллоҳ таоло уни Ўз раҳматига олсин, охиратларини обод этсин ва Қуръон билан охиратда ҳам бирга айласин.
Муҳаммад Айюб Файзуллоҳ домланинг саҳифасидан олинди.
Ҳасанхон Яҳё Абдулмажид тайёрлади.
Ушбу мақола Ўзбекистон Республикаси Дин ишлари бўйича қўмитасининг 2025 йил 22 июлдаги 03-07/4389-сонли рухсати асосида тақдим қилинди.
© islom.uz 2003-2025.
Барча ҳуқуқлар ҳимояланган. Сайтдан маълумот олинганда манба кўрсатилиши шарт.
Email: admin@islom.uz
Telegram: @portalislomuzadmin_bot
Ўзбекистон, Тошкент, 100185
Сўгалли ота кўчаси, 5-уй
