Қуръондан таъсирланиш | Қуръони Карим дарслари (166-дарс)
Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.
Аллоҳ таоло Фурқон сурасида шундай марҳамат қилади:
«Куфр келтирганлар: «Унга Қуръон бир йўла нозил қилинса эди», дедилар. Қалбингни у билан саботли қилишимиз учун шундай (қилдик) ва уни тартил билан тиловат қилдик», деган (32-оят).
Маълумки, Аллоҳ таоло Пайғамбаримиз соллаллоҳу алайҳи васалламга Қуръони Каримни бўлиб-бўлиб нозил қилар эди. Бир оят, икки оят ёки шароитга қараб, ундан кўпроқ оят ҳам нозил бўлган. Кофирларга бу иш ҳам ёқмади.
«Куфр келтирганлар: «Унга Қуръон бир йўла нозил қилинса эди», дедилар».
Бу талаблари уларнинг жоҳиллиги аломатидир. Аллоҳ таоло Қуръони Каримни бежиз бўлак-бўлак қилиб туширмаган. Бунда кўплаб илоҳий ҳикматлар бор. Мазкур ҳикматлар ҳақида кўп гапирилган. Ушбу ояти каримада эса улардан биттаси келтирилмоқда:
«Қалбингни у билан саботли қилишимиз учун шундай (қилдик) ва уни тартил билан тиловат қилдик».
Яъни, «Эй Муҳаммад, биз сенинг қалбингни Қуръон билан собит қилиш, қувватлаш учун уни бўлак-бўлак ҳолда нозил этдик ва гўзал равишда дона-дона қилиб ўқиб бердик».
Қуръон бирданига тушмасдан, бўлак-бўлак бўлиб тушар, ҳар ваҳий келганида Пайғамбар соллаллоҳу алайҳи васалламнинг қалблари қувватланар, кучларига куч, ғайратларига ғайрат қўшилар эди.
Кофирлар буни қаёқдан билсинлар?!
Аллоҳ таоло яна:
«Кофирларга итоат этма! Уларга қарши у (Қуръон) билан катта жидду жаҳд қил!», деган («Фурқон» сураси, 52-оят).
«Эй Пайғамбар, нима десалар ҳам, нима қилсалар ҳам, кофирларнинг гапига кирма, уларга итоат этма. Уларга қарши Қуръон билан катта жиҳод қил, ғалаба қиласан».
Дарҳақиқат, Қуръони Карим куфрга ва кофирларга қарши курашнинг асосий қуролидир. Пайғамбаримиз соллаллоҳу алайҳи васалламнинг ҳаётлари вақтида иймонга келганлар асосан Қуръондан таъсирланиб, иймон келтирганлар.
Ҳатто иймонга келмаганлари ҳам Қуръондан қаттиқ таъсирланар эдилар. Қурайш бошлиқлари кечаси бир-бирларидан беркиниб бориб, Пайғамбаримиз соллаллоҳу алайҳи васалламнинг тиловатларига қулоқ осганлари, ундан қаттиқ таъсирланганлари, бир-бирларини билиб қолиб, бировга айтмасликка, қайта Қуръон эшитмасликка ваъдалашганлари, шундай бўлса ҳам, кейинги кечаси қайтиб бориб, яна Қуръон тинглаганлари ҳақидаги ривоятлар маълум ва машҳур. Улардан бирини юқорида келтириб ҳам ўтдик.
Кейинги даврларда ҳам Ислом динини қабул қилганлардан кўплари «Нима учун бу динни қабул қилдингиз?» деган саволга «Қуръондан таъсирландим», деб жавоб берганлар.
Тараққий этган давлатларда турли кишиларда пайдо бўладиган руҳий таъсирланишни ўлчаш бўйича тажрибалар ўтказилган. Ана шу тажрибаларда Қуръони Каримни тинглаган ҳар қандай киши, ҳатто Аллоҳга иймон келтирмаган, араб тилини билмайдиган кишилар ҳам қаттиқ таъсирланиши замонавий асбоблар воситасида қайд этилган.
Қуръонни эшитиш, ўқиш, маъносини англаш имкони бўла туриб, унга иймон келтирмаслик учун, унга амал қилмаслик учун қандайдир бошқа махлуқ бўлиш керак, холос.
«Ҳадис ва ҳаёт» китобининг 30-жузи
Ушбу китоб Ўзбекистон Республикаси Дин ишлари бўйича қўмитанинг 2024 йил 23 январдаги 03-07/362-рақамли хулосаси асосида тайёрланди.
© islom.uz 2003-2026.
Барча ҳуқуқлар ҳимояланган. Сайтдан маълумот олинганда манба кўрсатилиши шарт.
Email: admin@islom.uz
Telegram: @portalislomuzadmin_bot
Ўзбекистон, Тошкент, 100185
Сўгалли ота кўчаси, 5-уй
