Бангладешнинг Ўзбекистондаги элчиси Муҳаммад Монирул Ислом «Hilol Nashr» нашриётида
Сўнгги йилларда Ўзбекистон ва Бангладеш давлатлари ўртасидаги муносабатлар янги босқичга кўтарилмоқда. Икки халқ ўртасидаги дўстона ришталар нафақат иқтисодий соҳада ўз самарасини бераётир, балки маданий-гуманитар алоқалар, зиёрат туризми, илм-фан ва маданият соҳаларидаги ҳамкорликлар ҳам мустаҳкамланмоқда.
Бугун, 15 август куни Бангладешнинг Ўзбекистондаги Фавқулодда ва мухтор элчиси, доктор Муҳаммад Монирул Ислом «Hilol Nashr» нашриёт-матбаасининг бош дўконига ташриф буюрди.
Меҳмонни нашриёт ходими Фозилжон Абдулқайюм самимият билан кутиб олди.
Ташриф давомида элчи нашриётнинг бош дўкон расталаридан жой олган диний-маърифий асарлар, турли мавзудаги китоблар билан танишди. У фазилатли шайх Муҳаммад Содиқ Муҳаммад Юсуф ҳазратларининг илмий мерослари, ҳаёт йўллари, қолдирган асарлари, буюк шахснинг миллат, дин ва маърифат йўлида қилган хизматлари ҳақида батафсил маълумотга эга бўлди.
Шунингдек, меҳмон «GRAND TA’LIM» ўқув маркази ва Янги аср университетининг таълим соҳасидаги фаолияти билан яқиндан танишиб чиқди.
Муҳтарам президентимизнинг шайх Муҳаммад Содиқ Муҳаммад Юсуф ҳазратларига бўлган юксак ҳурмат ва самимий эътирофлари халқимиз қалбидан муносиб баҳолангани барчамизга сир эмас. Давлат раҳбарининг бу каби эзгу муносабати нафақат шайх ҳазратларининг илмий меросига, миллатнинг юксак қадриятига бўлган эътиборнинг ёрқин ифодасидир.
Ташриф доирасида элчи жаноблари «Шайх Муҳаммад Содиқ Муҳаммад Юсуф» номидаги мажмуани зиёрат қилди. Унга масжид имом-хатиби, устоз Исмоил Муҳаммад Содиқ ҳамроҳлик қилдилар. Ташриф давомида меҳмон масжид хонақоҳи, унинг ҳузурбахш муҳити ва яратилган қулай шароитлар билан яқиндан танишди.
Ташриф давомида Ўзбекистон ва Бангладеш ўртасидаги муносабатлар изчил ривожланаётгани қайд этилди. Икки халқни тарих, дин, маданият ва адабиёт боғлаб тураётгани алоҳида таъкидланди. Шу билан бирга, Имом Бухорий, Беруний, Ибн Сино, Мирзо Улуғбек, Заҳириддин Муҳаммад Бобур ва Ал Фарғоний каби улуғ алломалар Бангладешда ҳам катта эҳтиром билан тилга олиниши эътироф этилди.
Зиёрат чоғида Бангладешнинг Ўзбекистондаги элчиси жаноб Муҳаммад Монирул Ислом юртимизда олиб борилаётган ислоҳотларни юксак баҳолади. У давлатимиз раҳбарининг сиёсий, ижтимоий ва диний-маърифий соҳаларда олиб бораётган саъй-ҳаракатларини нафақат мамлакат, балки бутун минтақада эътироф этилаётганини алоҳида таъкидлади. Меҳмон Ўзбекистондаги хайрли ислоҳотлар бардавом бўлишини тилаб, самимий эҳтиромини изҳор этди.
Ташриф ниҳоясида элчи жанобларига катта ҳажмдаги тажвидли «Қуръони Карим – мусҳафи шариф» туҳфа этилди.
© islom.uz 2003-2026.
Барча ҳуқуқлар ҳимояланган. Сайтдан маълумот олинганда манба кўрсатилиши шарт.
Email: admin@islom.uz
Telegram: @portalislomuzadmin_bot
Ўзбекистон, Тошкент, 100185
Сўгалли ота кўчаси, 5-уй
