Намангандаги Янги Ахси археологик мажмуасидан ноёб қўлёзма ва китоблар топилди
Намангандаги Янги Ахси археологик ёдгорлик мажмуасидан 50 дан ортиқ нодир қўлёзма ва тошбосма китоблар топилди. Бу ҳақда uza.uz сайти хабар берди.
Топилмалар орасида Абу Муъин Насафийнинг XI асрга оид нодир китоби, Қўқон хони Амир Умархоннинг мукаммал девони, Бухоро амири Саид Олимхоннинг топшириғи билан ўтган аср бошида Когондаги Дорус Салтана босмахонасида чоп этилган Мулло Муҳаммад Обиджон ибн Мулло Муҳаммад Қобил Охунд Намангонийнинг «Тухфатул обидин анисул ошиқин» китоблари мавжуд. Уларнинг энг қимматлилари қаторида Хожа Али Ромитаний, Хожа Аҳрори Валий, Мавлавий Абдулҳай Лакнавийларнинг нодир рисолалари турибди.
Таъкидлаш керак, манбалар ўрганилганда, Наманган, Тошкент, Бухоро ва Самарқанднинг йирик савдогарлари XIX асрнинг иккинчи ярми ва XX асрнинг бошида элга маънавият улашиш, зиё таратиш бўйича катта ҳажмда иш олиб борган.
Янги Ахси мажмуаси раҳбари, манбашунос олим Билолхон Рустамов ушбу топилмани тадқиқ этиш жараёнида Ҳожи Чироғиддин Сирожиддин тожир, Мулло Абдулқодир Маҳдум, Саййид Зафар Бухорий, Қобил Охунд Намангоний, Исҳоқхон Тўра Ибрат томонидан Лоҳур, Деҳли, Истанбул, Қозон, Тошкент босмахоналарида юзлаб томда, юз минглаб ададда китоблар бостирилгани ҳақида янги маълумотларни тақдим этди.
Топилмалар орасида Абу Бакр ибн Муҳаммад Али Қурайший томонидан тасниф этилган «Анисул воизин», Қорийнинг мукаммал девонлари, «Мифтохул Жунон Мисбохул иймон», Тарих китоби, Фирдавсийнинг «Шоҳнома»си, ҳадисларнинг форсий шарҳи берилган «Аходисул аъмол», грамматикага оид «Рисолати мағзи дар илми ҳарф», Саъдий Шеърозийнинг «Гулистон» асари, Мавлавий Шариф Бухорийнинг «Назмул Мухтасар», Зиёуддин Нахшабийнинг «Силку Сулук», шунингдек, «Туҳфатул Хомидия», «Мухтасари Туркий», «Таржиматус соил вал масоил», «Нафъул муфтий», «Дуррул Мажолис», «Иршоди толибин», «Рисолаи Анфоси нафси», «Муродул Орифин» каби нодир манбалар мавжуд.
Ахсикатийлар ва Ахсавийлар илмий тадқиқот марказидаги қўлёзма ва тошбосма манбалар сони ушбу топилмалар билан бирга 4000 мингдан ортди.
© islom.uz 2003-2024.
Барча ҳуқуқлар ҳимояланган. Сайтдан маълумот олинганда манба кўрсатилиши шарт.
Email: admin@islom.uz
Telegram: @portalislomuzadmin_bot
Ўзбекистон, Тошкент, 100185
Сўгалли ота кўчаси, 5-уй
