Тошкент ислом институтида халқаро илмий конференция ўтказилди
Бугун, 23 апрель куни Имом Бухорий номидаги Тошкент ислом институтида «Ислом дини асл манбаларини талқин қилишдаги ёндашувлар: муаммо ва ечимлар» мавзусида халқаро илмий-амалий конференция бошланди.
Конференция Қуръони Карим тиловати билан бошланди. Тиловатни ТИИ ўқитувчиси Абдулбосит қори Қобилов қилиб берди, сўнгра конференция ишига муваффақият сўраб дуо қилинди.
Конференцияни Ўзбекистон мусулмонлари идораси раиси ўринбосари, Тошкент ислом институти ректори, профессор Муҳаммадолим Муҳаммадсиддиқов кириш сўзи билан очиб берди.
Кейин Ўзбекистон мусулмонлари идораси раиси, муфтий Нуриддин Холиқназар ҳазратнинг конференция иштирокчиларига йўллаган табрик сўзи ўқиб эшиттирилди.
Шундан сўнг, Дин ишлари бўйича қўмита раисининг биринчи ўринбосари, профессор Давронбек Махсудов, Ўзбекистондаги ислом цивилизацияси маркази мутахассиси, устоз Абдулазиз Мансур, Ўзбекистон халқаро ислом академияси ректори (Phd) Уйғун Ғафуров табрик сўзлари асносида конференция ишига муваффақият тиладилар.
Конференция «Қуръоншуносликнинг долзарб масалалари» ҳамда «Глобаллашув даврида диний ихтилофларнинг олдини олишда ҳадис ва ҳадис илмларининг ўрни» шўъбаларда уламолар, устозлар ва тадқиқотчиларнинг маърузалари билан давом этди.
Мазкур халқаро анжуман шўъбаларида қуйидаги йўналишдаги масалалар муҳокама қилинди:
- Қуръон илмлари ва тафсирга оид замонавий илмий тадқиқотлардаги ёндашувлар;
- Оятлар тафсирида жамият тараққиёти масалаларининг ёритилиши;
- Қуръони Каримнинг ёш авлод тарбияси ва унинг тараққиётидаги ўрни;
- Қуръони Карим турли адашган тоифа ва оқимларга раддия;
- Қуръонга ҳурмат дунё барқарорлиги гарови;
- Замонавий оқимларнинг ботил иддаоларига аҳли сунна вал жамоа уламоларининг ҳадисларга асосоланган илмий раддиялари;
- Ҳадисларни аҳли сунна вал жамоа нуқтаи назаридан талқин қилишнинг аҳамияти;
- Ҳадис турлари ва уларнинг даражалари.
Сўнгра мавзулар юзасидан савол-жавоблар, баҳс-мунозаралар бўлиш баробарида таклиф ва хайрли ташаббуслар илгари сурилди.
© islom.uz 2003-2024.
Барча ҳуқуқлар ҳимояланган. Сайтдан маълумот олинганда манба кўрсатилиши шарт.
Email: admin@islom.uz
Telegram: @portalislomuzadmin_bot
Ўзбекистон, Тошкент, 100185
Сўгалли ота кўчаси, 5-уй
