Энг яхши мусулмон
Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.
Бироз эътиборсиз қолдирсанг, оддий иссиқ қаҳва совиб қолади-ю, севган инсонинг совиб қолмасмиди?!
Қаҳва жонсиз нарса бўла туриб, бироз ичмай қолдирсангиз, совиб қолади. Аёл кишининг эса жони, руҳи бор.
Гоҳида аёл киши ҳаётда кўп нарсаларга чидаши мумкин. Бироқ унга нисбатан эътиборсизликка чидай олмайди.
Аёл киши пули бор, келишган инсонни ёқтиради дейишади. Аслида аёл киши пулдор, келишган бўлмаса ҳам уни қадрлайдиган, камситмайдиган, қизғонадиган, суянч бўла оладиган, зулм қилмайдиган, дардларига шерик бўлиб, сўзларини тинглайдиган, хўрламайдиган, ночор ҳолда қолдирмайдиган эркакни севади.
Аёл киши вазир бўлса ҳам эридан ҳадя олса, қувонади.
Бошида эри бор аёлларнинг бахтига кўз тегмасин!
Бошида эри бўлмаса-да иффатини сақлаб, фарзандларига ҳам ота, ҳам она бўлаётган аёлларга саломлар бўлсин!
Имом Термизий раҳматуллоҳи алайҳ ривоят қилган ҳадисда шундай дейилган:
عَنْ عَائِشَةَ رَضِيَ اللهُ عَنْهَا، قَالَتْ: قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ: «خَيْرُكُمْ خَيْرُكُمْ لِأَهْلِهِ وَأَنَا خَيْرُكُمْ لِأَهْلِي...»
Оиша розияллоҳу анҳодан ривоят қилинади:
«Расулуллоҳ соллаллоҳу алайҳи васаллам: «Сизларнинг энг яхшиларингиз, аҳли аёлига яхшилик қиладиганларингиздир. Мен сизларнинг орангизда аҳли аёлига яхшилик қилишда энг яхшингизман», дедилар».
Пайғамбаримиз соллаллоҳу алайҳи васаллам мусулмонларнинг энг яхшиси ким эканини ҳадисда баён қилмоқдалар. Энг яхши мусулмон аҳли аёлига яхшилик қилувчи экан.
Биз ҳам шу ҳадисга амал қилиб аҳли аёлимизга яхши муносабатда бўлайлик.
Яратган Эгам жуфти ҳалолларимизга биз билан қўша қаришларини насиб этсин, оила қуриш истагидаги аёлларга ўзлари кутгандан зиёда бахт берсин!
Нозимжон Ҳошимжон
Ушбу мақола Ўзбекистон Республикаси Дин ишлари бўйича қўмитанинг 2024 йил 21 февраль 03-07/921-сонли хулосаси асосида тайёрланди.
© islom.uz 2003-2025.
Барча ҳуқуқлар ҳимояланган. Сайтдан маълумот олинганда манба кўрсатилиши шарт.
Email: admin@islom.uz
Telegram: @portalislomuzadmin_bot
Ўзбекистон, Тошкент, 100185
Сўгалли ота кўчаси, 5-уй
