Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.

Биз Қуёш тизимидаги Ер сайёрасида яшаймиз. Қуёш ўзининг тўққизта сайёраси билан Сомон йўли галактикаси таркибига киради.

Сомон йўли галактикаси умумий ўзаро тортишиш кучи билан боғланган ҳамда Қуёшни ҳам ўз ичига олган 200 млрд.дан ортиқ юлдузнинг улкан гравитацион системасидир.

Соддароқ айтганда, миллиардлаб юлдузларнинг бир жойга тўпланган кўриниши галактика дейилади.

Сомон йўли галактикасининг умумий узунлиги тахминан 100 минг ёруғлик йилига тенг.

Бу битта галактиканинг таърифи бўлиб, унда қанча юлдуз борлигини, катталиги қай даражада эканини билдингиз.

Энди расмга қаранг. Сиз 140 000 та космик оролни кўриб турибсиз. Ёрқин бўлиб кўриниб турган ҳар бир нуқта — бутун бошли галактика. Яъни, шу ҳар бир нуқтанинг ичида миллиардлаб юлдузлар, триллионлаб сайёралар бор. Эҳтимол, уларнинг қайсидир бирида бизникига ўхшаган ёки ўхшамаган ҳаёт бордир.

Расмнинг масштаби қанчалик улканлигини ўйлаб кўринг. Бу расмдаги нуқталар Аллоҳ таолонинг қудратига, азаматига, буюк мусаввирлигига далолат қилади.

Расм борасида тафаккур қилиб, ундан ибрат олиб, Роббимизга бўлган таслимиятимиз, иймонимиз нури янада зиёда бўлишига эришиш мақсадимиздир. Аллоҳ таоло бизни шу мақсадга эриштирсин.

Нозимжон Ҳошимжон тайёрлади