Masjidimizda Ramazon shukuhi
Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.
Qurʼon tadabburi uchun qulay imkoniyatdan foydalaning!
Azizlar, barchangizni kirib kelgan Ramazoni sharif oyi bilan yana bir bor muborakbod etamiz.
Har yilgidek, bu yil ham Ramazon oyi o‘zgacha shukuh bilan kirib keldi. Barchamiz uchun sabr-qanoat, xayr-saxovat mavsumi, Kalomulloh tilovati, xatmi Qurʼonlar mavsumi, gunohlardan poklanib, behisob ajru savoblarga erishish, jahannam azobidan najot topish mavsumi boshlandi.
Yurtimizdagi minglab masjidlar qatori, shayx Muhammad Sodiq Muhammad Yusuf jomeʼ masjidida ham taroveh namozlari o‘qilmoqda. Har yilgidek, bu yil ham taroveh namozlari barcha ijtimoiy tarmoqlar orqali onlayn efirga uzatilmoqda. Ammo fazilatli shayx hazratlarining anʼanasiga sodiq qolib, masjidimiz ahli siz azizlar uchun bu borada o‘ziga xos yangilikni Ramazon tuhfasi o‘laroq taqdim etmoqdalar.
Gap shundaki, bu yildan boshlab taroveh namozlaridagi xatmlar paytida efirda ayni paytda o‘qilayotgan Qurʼoni Karim oyatlari hamda shayx Muhammad Sodiq Muhammad Yusuf hazratlarining qalamiga mansub maʼno tarjimalari ham uzatilmoqda.
Shu munosabat bilan barcha qalbi Qurʼonga oshno azizlarimizni Qurʼon tadabburiga chorlaymiz. Xususan, masjidga kela olmaydigan nuroniylarimizni, imkoniyati cheklangan matonat ahlini, Ramazon kunlarida ikki hissa ajru savobga ega bo‘layotgan uy bekalari va barcha opa-singillarimiz xatmi Qurʼonga someʼ bo‘lish bilan birga, oyati karimalarni musʼhaf yozuvida o‘qib, ularning maʼnolarini ham tadabbur qilishga taklif etamiz.
Alloh taolo barchamizga ushbu Ramazon oyini iymon, ixlos, taqvo va maʼrifat oyi qilsin!
Xatmi Qurʼonga, Qurʼon tadabburiga marhamat, azizlar!
© islom.uz 2003-2025.
Барча ҳуқуқлар ҳимояланган. Сайтдан маълумот олинганда манба кўрсатилиши шарт.
Email: admin@islom.uz
Telegram: @portalislomuzadmin_bot
Ўзбекистон, Тошкент, 100185
Сўгалли ота кўчаси, 5-уй
