Цирк кассаси олдидаги воқеа
Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.
Тарихдаги машҳур комик актёр Чарли Чаплин айтади:
«Болалигимда отам билан цирк томоша қилгани бордим. Касса олдида узун навбатга турдик. Биздан олдинда олти болали ота-она катта бир оила бўлиб навбат кутиб турар эди. Уларнинг уст-бошларида камбағаллик асари сезилиб турар эди. Кийимлари эски, бироқ тоза эди.
Болалар жуда хурсанд, улар цирк ҳақида суҳбатлашишар эди. Навбатлари келганда ота касса дарчасига яқинлашиб чиптанинг нархини сўради. Касса ходими чипта нархини айтганда ота ноқулай аҳволга тушиб, аёлининг қулоғига бир нарса дея пичирлай бошлади. Отанинг ноқулай вазиятда қолгани юзида яққол акс этиб турар эди. Шу пайт отам ҳамёнидан 20 доллар чиқариб, ерга ташлаб юборди.
Сўнг энгашиб, пулни олди-да, бояги отанинг елкасига қўлини қўйиб: «Пулингиз тушиб қолибди», деди. Ҳалиги одам отамга қаради ва кўзида ёш билан: «Раҳмат жаноб», деди. Улар цирк томошасига кириб кетишгандан сўнг, отам қўлимдан тутиб, мени ташқарига олиб чиқди. Чунки унда ўша одамга берган 20 долларидан бошқа пули йўқ эди.
Ўша кундан бери мен отам билан фахрланаман. Шу воқеада отамнинг фаросат билан тутган йўли ҳаётимда кўрган энг гўзал томоша эди. Ушбу воқеа ўшанда мен кўра олмаган цирк томошасидан ҳам анча гўзалроқ эди».
Доктор Муҳаммад Ротиб Набулсий ҳафизаҳуллоҳ ота-онанинг ўрнак бўлиши ҳақида шундай насиҳат қилганлар:
«Фарзандлар оилада қулоқлари билан эмас, кўзлари билан таълим оладилар».
Болангизнинг кўз ўнгида фақирга моддий ёрдам беришингиз, садақа ҳақидаги мингта дарсга тенгдир.
Болангизнинг кўз ўнгида ахлатни чиқинди ташлайдиган жойга ташлашингиз, поклик, тозалик ҳақидаги панд-насиҳатлардан таъсирлироқдир.
Ота-онанинг солиҳлиги ва улар қиладиган солиҳ амалларнинг фарзандларининг тарбиясига катта таъсири бор. Бу нарсанинг фарзандларга дунёда ҳам, охиратда ҳам улкан фойдаси бор. Ота-оналар қиладиган ёмон ишларнинг ҳам фарзандлар тарбиясига ёмон таъсири бор.
Мазкур таъсирлар қуйидаги кўринишда бўлади:
- Ота-оналар қилган яхши амалларнинг фарзандлар тарбиясига ижобий таъсир қилиши, ўша солиҳ амалларнинг баракасидир. Қолаверса, бу Аллоҳ таолонинг ўша солиҳ амалларга берган мукофотидир.
- Ота-оналар қилган ёмон амалларнинг фарзандлар тарбиясига салбий таъсир қилиши, ўша ёмон амалларнинг зарари, шумлигидир. Қолаверса, бу Аллоҳ таолонинг ўша ёмон амал қилувчилардан ўч олиши ва ёмон амалларга берган иқобидир.
Мукофоти – фарзандларнинг солиҳ бўлиши, соғлом бўлиши, ризқларининг кенг бўлиши ва ҳоказо кўринишда бўлади.
Жазоси – фарзандларнинг тўғри йўлдан оғишлари, улардан турли бало-мусибатларнинг аримаслиги, ёмон касалликларга дучор бўлишлари ва ҳоказо кўринишида бўлади.
Шундай экан, ота-оналар солиҳ амалларини кўпайтирсинлар! Бунинг таъсири фарзандларида кўринади, акс этади.
Хуллас тарбияда ўзимиз намуна бўлайлик!
Ҳаммуаллиф: Нозимжон Ҳошимжон ва Хуршид Маъруф тайёрлади
© islom.uz 2003-2024.
Барча ҳуқуқлар ҳимояланган. Сайтдан маълумот олинганда манба кўрсатилиши шарт.
Email: admin@islom.uz
Telegram: @portalislomuzadmin_bot
Ўзбекистон, Тошкент, 100185
Сўгалли ота кўчаси, 5-уй
