Муҳаббат ва садақа
Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.
Расулуллоҳ соллаллоҳу алайҳи васалламнинг райҳоналари бўлмиш Фотима розияллоҳу анҳо тегирмон айлантиравериб қўллари қавариб кетганидан, мешда сув ташийвериб елкалари шилинганидан, уй супуриб кийимлари чанг бўлганидан турмуш ўртоқлари Али розияллоҳу анҳуга шикоят қилдилар. Али розияллоҳу анҳу Расулуллоҳ соллаллоҳу алайҳи васалламга асирлар келганини, у кишидан ходим сўрашларини айтдилар.
Фотима розияллоҳу анҳо Набий соллаллоҳу алайҳи васалламнинг ҳузурларига бордилар. У кишининг ҳузурларида бир неча кишилар бор экан. Уларнинг олдида эҳтиёжларини айта олмадилар. Оиша онамиз розияллоҳу анҳуга секин нима сабабдан келганларини айтдилар ва қайтиб кетдилар.
Набий соллаллоҳу алайҳи васалламнинг олдиларидан кишилар кетганидан сўнг Оиша онамиз розияллоҳу анҳо Фотима розияллоҳу анҳонинг келганларини айтдилар. Расулуллоҳ соллаллоҳу алайҳи васаллам Фотима розияллоҳу анҳонинг уйларига бордилар. Улар ухламоқчи бўлиб туришган экан. Киришга изн сўрадилар. Сўнгра кириб уларга дедилар:
Сизларга ходимдан ҳам яхшироқ нарсани айтайми? Ухлаш учун тўшакка кирсангиз ўттиз уч марта такбир айтинг, ўттиз уч марта тасбиҳ айтинг, ўттиз уч марта таҳмид айтинг. Ана шулар сиз учун ходимдан яхшироқдир!
Бутун дунё аёлларининг саййидаси, Расулуллоҳ соллаллоҳу алайҳи васалламнинг жигарпоралари бўлмиш Фотима розияллоҳу анҳо тегирмон айлантиравериб қўллари қавариб кетибди. Сув ташийвериб елкалари шилинибди. Уй супуравериб кийимлари чанг бўлибди. Бу билан Фотима розияллоҳу анҳонинг қадрлари эрлари наздида камайдими, оталари наздида камайдими, Роббилари наздида камайдими?!
Эр ҳатто уй ишларида хотинига ёрдамлашиб туриши гўзал муомалот ва суннатдандир.
Фотима розияллоҳу анҳо чўри эмас эдилар. У кишини ҳеч ким хорламаган эди. Аммо уй ишлари у кишини чарчатган эди. Али розияллоҳу анҳунинг ходима олиб бермаганларига сабаб пуллари йўқлиги эди. Мақсад Фотима розияллоҳу анҳони қийнаш эмас эди. Расулуллоҳ соллаллоҳу алайҳи васаллам ҳам Фотима розияллоҳу анҳога ходима бермадилар. Зеро, у киши одил эдилар. Агар Фотима розияллоҳу анҳога ходима берсалар, Мадинадаги бошқа аёлларга ҳам ходима беришлари лозим бўлиб қолар эди.
Эркак кишининг хотинининг оғзига соладиган биргина луқмасида садақанинг ажри бўлса, аёлнинг оиласи учун бу луқмани пишириб бериши, уларга чиройли тақдим қилиши, оиласининг кийимларини ювиши нега савоб бўлмасин?!
Азиз эркаклар! Аёлларимизга идишларни ювишда ёрдам беришимиз эркакликка зид эмас. Улар ювган ва дорда қуриган кийимларни йиғиштириб олишимиз мардликка тескари эмас. Расулуллоҳ соллаллоҳу алайҳи васаллам ҳам оламларнинг саййиди бўлсаларда, уй ишларида аҳлларига ёрдам берар, қўйларини ўзлари соғар, кийимларига ямоқ солар, йиртилган ковушларини ўзлари тикар эдилар!
Абдулқодир Полвонов
© islom.uz 2003-2026.
Барча ҳуқуқлар ҳимояланган. Сайтдан маълумот олинганда манба кўрсатилиши шарт.
Email: admin@islom.uz
Telegram: @portalislomuzadmin_bot
Ўзбекистон, Тошкент, 100185
Сўгалли ота кўчаси, 5-уй
