Раҳмат бўлган Ҳабибим соллаллоҳу алайҳи васаллам
Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.
Имом Баззор раҳимаҳуллоҳ Оиша онамиз розияллоҳу анҳодан ривоят қиладилар: “Набий соллаллоҳу алайҳи васалламни мамнун ҳолда кўрганимда у зотга: “Эй Аллоҳнинг Расули, менинг ҳаққимга Аллоҳга дуо қилинг” дедим.
У зот: “Эй Аллоҳ, Оишанинг аввалги ва кейинги, яширин ва ошкора гуноҳларини мағфират қилгин” деб дуо қилдилар”.
Оиша онамиз розияллоҳу анҳо қаттиқ кулдилар, ҳатто кулгудан бошлари билан Расулуллоҳ соллаллоҳу алайҳи васалламнинг қўйниларига йиқилдилар.
Шунда Расулуллоҳ соллаллоҳу алайҳи васаллам: “Дуоим сени хурсанд қилдими?” деб сўрадилар. Оиша онамиз розияллоҳу анҳо: “Сизнинг дуоингиз қандай қилиб мени хурсанд қилмасин?!” деб жавоб бердилар.
Шу пайт Расулуллоҳ соллаллоҳу алайҳи васаллам: “Аллоҳга қасамки, бу ҳар намозда умматимнинг ҳаққига қиладиган дуоимдир!” дедилар.
Раҳмат қилиб юборилган Пайғамбаримиз соллаллоҳу алайҳи васалламнинг биз умматларига меҳрибонликларини қаранг.
Пайғамбаримиз соллаллоҳу алайҳи васаллам Оиша онамиз розияллоҳу анҳонинг жуда хурсанд бўлишларига сабаб бўлган дуони биз умматларнинг ҳаққига қилар эканлар.
Қилганда ҳам бир-икки марта эмас, балки ҳар куни, ҳар намозда қилар эканлар.
Намоз энг улуғ ибодатлардан эканини ҳисобга олсак, Пайғамбаримиз соллаллоҳу алайҳи васаллам биз умматларининг ҳаққимизга ана шу буюк ибодат асносида дуо қилар эканлар.
Қолаверса, оламлар сарвари, Пайғамбарлар алайҳимуссаломнинг улуғи, Оламлар Роббининг эркаси бўлган Пайғамбаримиз соллаллоҳу алайҳи васалламнинг дуолари, иншаа Аллоҳ, ижобатдир.
Ҳар биримизда гуноҳ, камчилик бор. Биз ожиз бандалар гуноҳларимизнинг кечирилишига муҳтожмиз. Хўш, гуноҳларни ким мағфират этади? Албатта, Аллоҳ таоло!
Биз гуноҳкор қуллар учун аввалги ва кейинги, ошкора ва яширин гуноҳларимизнинг мағфират этилиши буюк саодатлардандир. Демак, Пайғамбаримиз соллаллоҳу алайҳи васалламнинг мазкур дуолари биз учун сув ва ҳаводек зарур бўлган дуолардандир.
Аллоҳ таоло Пайғамбаримиз соллаллоҳу алайҳи васалламга, у зоти бобаракотнинг аҳли байтларига, содиқ саҳобаларига чексиз салавот, салом, баракот ва дуруд юборсин!
Аллоҳ таоло биз гуноҳкор бандаларнинг аввалги-кейинги, ошкора-яширин, билиб-билмай, катта-кичик, қасддан-ноқасддан қилган гуноҳларимизни мағфират этсин!
Роббимиз барчамизни Ўзининг ҳидоятидан айирмасин ва хотимамизни чиройли қилсин!
Интернет маълумотлари асосида
Нозимжон Ҳошимжон тайёрлади
© islom.uz 2003-2025.
Барча ҳуқуқлар ҳимояланган. Сайтдан маълумот олинганда манба кўрсатилиши шарт.
Email: admin@islom.uz
Telegram: @portalislomuzadmin_bot
Ўзбекистон, Тошкент, 100185
Сўгалли ота кўчаси, 5-уй
