Қиёматда ҳаммамиз сўраламиз!
Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.
Пайғамбаримиз соллаллоҳу алайҳи васаллам дедилар:
«Ҳар бирингиз мутасаддисиз, ҳар бирингиз қўл остингиздагилар учун масъулсиз. Ҳар бир раҳбар инсонлар устидан мутасаддидир ва улар учун масъулдир. Эр ўз аҳли аёли ва қўл остидагилар устидан мутасаддидир ва улар учун масъулдир. Хотин эрининг уйида мутасаддидир ва қўл остидагилар учун масъулдир. Қул хожасининг молига мутасаддидир ва унинг учун масъулдир. Ҳар бирингиз қўл остингиздагилар учун масъулсиз» (Имом Бухорий ривояти).
Ҳар бир раҳбар қўл остидагилардан сўралади.
Оила раҳбари оила аъзоларидан сўралади. Уларга тарбия, таълим берганидан, нафақа билан таъминлаганидан, алиментни вақтида, ҳийла ишлатмай берганидан, ҳаммасидан сўралади.
Аёл эрининг уйида, рўзғор ишида масъулдир ва рўзғорликка олиб келинган маҳсулотларни қандай ишлатгани, уй ишини қандай юритганидан сўралади.
Корхона, завод, фабрика, компания, фирма, ХТТ, МЧЖ раҳбарларлари ичши ходимлари ҳақида сўралади.
Маҳалла раиси маҳалладошларидан сўралади.
Шаҳар ҳокими шаҳар аҳолисидан сўралади.
Туман ҳокими туман аҳолисидан сўралади.
Вилоят ҳокими вилоят аҳолисидан сўралади.
Ҳар бир вазирлик, қўмита раҳбарлари ўз вазифаларини қандай бажарганларидан, ўз йўналишларида, тизимларида халққа қандай хизмат қилганларидан сўраладилар.
Давлат раҳбари мамлакат аҳолисига қандай раҳбарлик қилганидан сўралади. Зулмга йўл қўйдими, йўқми, адолатли раҳбар бўлдими, йўқми, ҳаммасидан сўралади.
Қаерда сўралади?
Бу дунёда масъулиятни қанчалик ҳис қилгани, вазифасини қандай бажарганидан, албатта, охиратда сўралади.
Охиратда банда Аллоҳ таолонинг ҳузурида У Зотга ҳисоб беради.
Охиратни, ҳисоб беришни ўйлаган раҳбар шунга қараб ҳаракат қилади.
Беш кунлик дунёда еб-ичиб, айшимни суриб қолай деб, охиратни унутган раҳбар қиёматда жуда қийин аҳволда қолади.
Зулмга учраган фуқаролар, аҳоли, маҳалладошлар, ходимлар, оила аъзолар қиёмат куни ҳаққиларини талаб қилишса, Аллоҳ таоло масъулиятсиз, золим раҳбардан мазлумларнинг ҳаққини олиб беради. То мазлумлар ўша раҳбарни кечирмагунча, Аллоҳ таоло кечирмайди.
Хуллас, раҳбарлик курсисида ўтирган ҳар бир банда кўзини каттароқ очиши, Аллоҳ таолодан ўзини масъулиятни ҳис қиладиган банда қилиб қўйишини, одамларга зулм қилишдан тийилиб, адолатли иш юритувчи инсон қилиб қўйишини йиғлаб сўраши лозим.
Аллоҳ таоло ҳар биримизнинг масъулиятли бўлишимизни насиб этсин, У Зот барчамизни Ўзининг ҳидоятидан айирмасин ва хотимамизни чиройли қилсин!
Нозимжон Ҳошимжон тайёрлади
© islom.uz 2003-2026.
Барча ҳуқуқлар ҳимояланган. Сайтдан маълумот олинганда манба кўрсатилиши шарт.
Email: admin@islom.uz
Telegram: @portalislomuzadmin_bot
Ўзбекистон, Тошкент, 100185
Сўгалли ота кўчаси, 5-уй
