Аҳдга вафо шунчалик бўлар!
Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.
Ҳузайфа ибн Ямон розияллоҳу анҳумо оталари билан бирга Мадинага, Пайғамбар соллаллоҳу алайҳи васалламнинг зиёратларига отланишди. Қурайш кофирлари уларни йўлда тутиб олишди ва то Мадинадан ортга қайтишга, ҳамда Расулуллоҳ соллаллоҳу алайҳи васаллам билан биргаликда жангга чиқмасликка келишишмагунча уларни қўйиб юборишмади.
Улар Мадинага келганларида Бадр ғазотига тайёргарлик кетаётганди. Шунда ота-бола Расулуллоҳ соллаллоҳу алайҳи ва саллам билан биргаликда ғазотга чиқишни хоҳлашди.
Лекин Расулуллоҳ соллаллоҳу алайҳи васаллам уларга бундай дедилар: «Ортга қайтинглар! Биз уларга берган аҳдимизга вафо қиламиз. Уларга қарши мададни эса Аллоҳдан сўраймиз!».
(Имом Муслим «Саҳиҳ»ларида ривоят қилганлар).
Ота-онам сизга фидо бўлсин, ё Расулаллоҳ!
Бу ривоятни ўқиган кунимдан бери ҳаяжондаман. Аҳдга вафо бўлса шунчалик бўлар!! Ваҳоланки.
1 Мушриклар билан битимни у зот тузмаганлар. Лекин «аҳдимизга» деб оддий мусулмоннинг ваъдасини зиммаларига олмоқдалар.
2 Асҳобларининг битимини ўзларига нисбат бериб «вафо қиламиз» демоқдалар. Дўстларимиз мусулмонларга муносабатда бу таълимотга жуда муҳтожмиз шу кунларда.
3 Ахлоқнинг юқори намунасини кўрсатиб бўлгач, эътиқоднинг ёрқин намунаси - Аллоҳга таваккулни очиқ намоён этмоқдалар: «Уларга қарши мададни эса Аллоҳдан сўраймиз!».
Мутолаа қилаётганим шайх Муҳаммад Тақий Усмонийнинг «Мақолоту Усмоний» китобида бундай гўзал ахлоқ намуналарига бот-бот дуч келаверганим учун Расулуллоҳ соллаллоҳу алайҳи васалламнинг нақадар буюк зот бўлганларини карра-карра ҳис қиляпман!
Мубашшир домла Аҳмад
© islom.uz 2003-2025.
Барча ҳуқуқлар ҳимояланган. Сайтдан маълумот олинганда манба кўрсатилиши шарт.
Email: admin@islom.uz
Telegram: @portalislomuzadmin_bot
Ўзбекистон, Тошкент, 100185
Сўгалли ота кўчаси, 5-уй
