Сийрат дарслари (165-дарс) Фитрат
Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.
603. Абу Ҳурайра розияллоҳу анҳудан ривоят қилинади:
«Расулуллоҳ соллаллоҳу алайҳи васалламнинг: «Фитрат бештадир: хатна; ҳаром тукларни тозалаш; қўлтиқ (остидаги мўй)ни юлиш; мўйлабни қирқиш; тирноқларни олиш», деяётганларини эшитдим».
Бухорий ва Муслим ривоят қилишган.
«Фитрат» сўзи бу ўринда «анбиёлардан суннат бўлиб келаётган покланиш» маъносини билдиради.
604. Анас ибн Молик розияллоҳу анҳудан ривоят қилинади:
«Биз учун мўйлабни қайчилаш, тирноқларни қисқартиш, қўлтиқ (остидаги мўйлар)ни юлиш ва қовуқни қиришни қирқ кечадан кўпга қолдирмаслигимизга муддат белгиланган».
Муслим ривоят қилган.
605. Абдуллоҳ ибн Умар розияллоҳу анҳумодан ривоят қилинади:
«Расулуллоҳ соллаллоҳу алайҳи васаллам: «Ким ўзига бино қўйиб кийимини судраб юрса, Қиёмат куни Аллоҳ унга назар солмайди», дедилар. «Эй Аллоҳнинг Расули, кийимимнинг бир тарафини ушлаб юрмасам, бўшаб, осилиб қолаверади», деди Абу Бакр. «Сен буни ўзингга бино қўйиб қилмайсан-ку!», дедилар».
Бухорий ва Муслим ривоят қилишган.
606. Абдуллоҳ ибн Умар розияллоҳу анҳумодан ривоят қилинади:
«Расулуллоҳ соллаллоҳу алайҳи васаллам: «Ким манманлик билан кийимини судраб юрса, Қиёмат куни Аллоҳ унга назар солмайди», дедилар».
Бухорий ва Муслим ривоят қилишган.
«Расулуллоҳ соллаллоҳу алайҳи васаллам» китобидан
© islom.uz 2003-2025.
Барча ҳуқуқлар ҳимояланган. Сайтдан маълумот олинганда манба кўрсатилиши шарт.
Email: admin@islom.uz
Telegram: @portalislomuzadmin_bot
Ўзбекистон, Тошкент, 100185
Сўгалли ота кўчаси, 5-уй
