Диннинг қуёши бўлган Шамсиддин (иккинчи мақола)
Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.
Мулла Шамсиддин қори домла ўзидан мерос қилиб кўплаб шогирд ва уламоларни қолдирди. Ўрта Осиёлик кўплаб машҳур уламолар у кишининг илмий суҳбатларида бўлиб, таълим олишга муяссар бўлишган. Қори домланинг укаси Жамолхон қори ва синглиси Марямхон ойимлар ҳам акасининг қўлларида таълим олиб, мураттаб қори ва амалли олимлардан бўлишди. Ҳазрат қори домла узоқ йиллар «Шайх эшон» жоме масжидида имомлик қилдилар. Рамазон ойида 30 кун таровеҳ намозида хатми Қуръонга ўтиб, чарчоқ ва ҳориш нималигини билмай, атрофдаги ёшларга бақувват ва серғайрат эканликлари билан юксак намуна бўлдилар.
Шогирдларидан бири шундай хотирлайди: «Устозимиз Мулла Шамсиддин қори домла ўта ҳалим, Қуръон ва суннатни маҳкам ушлаган, зуҳд ва тақвода пешқадам ва очиқ кўнгил инсон эдилар. У киши фарз ибодатлардан ташқари нафл ибодатларни ҳам кўп қилар эдилар. Аллоҳга бўлган чин эътиқодларининг ёрқин мисоли, 54 йил кунора рўза тутиб, тунлари ибодат билан ўтказдилар. Куни билан оила тебратиш мақсадида косибчилик қилар, бўш вақтларида эса доимо китоб мутолаа қилардилар».
Мустақилликка эришганимиздан сўнг қори домла мударрислик фаолияти билан шуғулландилар. Ҳазрат 1991 йили Мулла Қирғиз (Ҳозирги Ҳидоя) мадрасаси очилган кундан то умрларининг охиригача ушбу масканда мударрислик қилдилар. Мадрасада талабаларга фиқҳ ва ақоид фанидан сабоқ бердилар. Қолаверса, «Тафсиру Жалолайн», «Мишкотул-масобиҳ», «Ҳидоя», «Мухтасарул-виқоя» каби ҳанафий мазҳабининг мўътабар китобларидан таълим бердилар.
Қори домла 1998 йил Рамазон ойнинг 21 куни оламдан ўтдилар. Шаҳарнинг катта қабристони Мавлавий мозорига дафн этилдилар. Шамсиддин қори домланинг 4 қиз ва 2 ўғиллари бор.
Улар: Бадриддин (1967), Фатҳиддин (1970).
Катта ўғиллари боболарининг касбларини давом эттириб косибдўзлик қиладилар.
Кичик ўғиллари эса «Шайх эшон» масжидида узоқ йиллардан бери имом бўлиб, дин йўлида хизмат қилмоқдалар.
Ушбу маълумотлар Шамсиддин қори домла авлодларининг шахсий архивидан олинди
Акрам Шарипов, мустақил тадқиқотчи,
Чиноз тумани Олмазор қўрғони.
© islom.uz 2003-2025.
Барча ҳуқуқлар ҳимояланган. Сайтдан маълумот олинганда манба кўрсатилиши шарт.
Email: admin@islom.uz
Telegram: @portalislomuzadmin_bot
Ўзбекистон, Тошкент, 100185
Сўгалли ота кўчаси, 5-уй
