Сизнинг ҳам шундай қўшнингиз борми?
Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.
Ўзлари муҳтож бўла туриб, муҳожирларга ёрдам қўлини узатган ансорлар ҳақида Аллоҳ таоло шундай деб марҳамат қилган:
وَالَّذِينَ تَبَوَّءُوا الدَّارَ وَالْإِيمَانَ مِن قَبْلِهِمْ يُحِبُّونَ مَنْ هَاجَرَ إِلَيْهِمْ وَلَا يَجِدُونَ فِي صُدُورِهِمْ حَاجَةً مِّمَّا أُوتُوا وَيُؤْثِرُونَ عَلَىٰ أَنفُسِهِمْ وَلَوْ كَانَ بِهِمْ خَصَاصَةٌ ۚ وَمَن يُوقَ شُحَّ نَفْسِهِ فَأُولَٰئِكَ هُمُ الْمُفْلِحُونَ
«Улардан аввал бу диёрда ва иймонда қарор топганлар ўзларига ҳижрат қилиб келганларни севарлар ва уларга берилган нарсаларга қалбларида ҳасад қилмаслар. Ва гар ўзларининг ҳожатлари бўлса ҳам, (уларни) ўзларидан устун қўярлар. Ким ўз нафсининг зиқналигидан сақланса, ана ўшалар зафар топувчилардир» (Ҳашр сураси, 9-оят)
Термизийнинг ривоятида:
«Аллоҳнинг ҳузурида асҳобларнинг энг яхшиси соҳибига яхши бўлганидир. Аллоҳнинг ҳузурида қўшниларнинг энг яхшиси қўшнисига яхши бўлганидир», дейилган. Аллоҳ билгувчироқдир.
Шарҳ: Шунинг учун ҳам ҳар доим дўст-биродарларга ва қўшниларга яхши муносабатда бўлишга ҳаракат қилмоқ зарур.
Ўзига тўқ бир киши ҳайит арафасида махфий равишда қўй садақа қилмоқчи бўлди. Қўйни бир вакил орқали камбағал танишига юборди. Юбориш олдидан вакилдан танишига исмини айтмаслигини илтимос қилди.
Орадан бир неча кун ўтгач, воқеамиз қаҳрамони бозорда айланиб юрса, ҳалиги камбағал киши ҳам бозорда турган экан, ёнида эса ўзи садақа қилган қўй бор эди. Воқеамиз қаҳрамони фақир кишининг ўша қўйни сотмоқчилигини кўриб, ҳайрон бўлди ва ёнига бориб, «Қўйни нега сотмоқчисиз?» деб сўради.
Шунда фақир киши: Менга бу қўйни бир муҳсин, қўли очиқ киши берганди. Кўриб турганингиздек, бу жонивор каттагина. Ён қўшним бор, бечоранинг ҳайитга қўй сотиб олишга қурби етмайди. Шунинг учун қўйимни сотгани олиб келдим. Буни сотиб, пулига кичикроқ қўйдан иккита оламан-у, биттасини қўшнимга бераман» деди.
Аллоҳ таоло бизни қўшнисига яхшилик қилувчи бандаларидан айласин, барчамизни Ўзининг ҳидоятидан айирмасин ва хотимамизни чиройли қилсин!
Islom.uz, Quran.ksu.edu.sa, fiqh.uz маълумотлари асосида
Нозимжон Ҳошимжон тайёрлади
© islom.uz 2003-2025.
Барча ҳуқуқлар ҳимояланган. Сайтдан маълумот олинганда манба кўрсатилиши шарт.
Email: admin@islom.uz
Telegram: @portalislomuzadmin_bot
Ўзбекистон, Тошкент, 100185
Сўгалли ота кўчаси, 5-уй
