Муҳаммад Мутаваллий Шаъровий раҳимаҳуллоҳнинг ҳикматли сўзлари
Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.
- Агар ҳақ сўзни айтолмасанг, ботилга қарсак чалма!
- Агар сенга ҳасад қилувчини тополмасанг, билки, сен муваффақиятсиз инсон экансан.
- Аллоҳга, бирор нарса бериши учун эмас, рози бўлиши учун ибодат қил! Агар рози бўлса, неъматлари билан сени ҳайрон қолдиради.
- Ҳожатинг борлигида, бошингга ташвиш тушганда Аллоҳ таоло сени эслаши учун роҳат-фароғатга эришган пайтингда Аллоҳни эсла!
- Албатта, мўмин инсон эртанги кундан қўрқмайди, ахир Аллоҳ оламларнинг Робби бўла туриб, банда қандай қилиб эртанги кундан қўрқсин. Агар мўмин инсоннинг олдида таом бўлмаса, Аллоҳ унга ризқ беришига ишончи бўлади. Чунки Аллоҳ оламларнинг Роббидир. Агар мўминга бир ташвиш етса, Аллоҳ ташвишни аритади деб хотиржам бўлади. Чунки У Зот оламларнинг Роббидир. Агар бир неъмат келса, Аллоҳни зикр қилиб, У Зотга шукр айтади. Чунки унга неъмат берган Зот оламларнинг Роббидир!
- Агар мусулмонларнинг юртида фақирни кўрсанг, билгинки, унинг молини ўғирлаган бой бор.
- Ҳар бир бўстонга гул экишинг чиройли, лекин ундан ҳам чиройлироқ амал ҳар бир тилга Аллоҳнинг зикрини экишингдир (яъни, ҳар бир инсоннинг Аллоҳ таолони зикр қилишига сабабчи бўлишингдир).
- Ҳар бир гуноҳкор қиёмат куни ўз гуноҳини кўтариб келади. Аммо адаштирувчи кимса ўзининг гуноҳини ва адаштирганларининг гуноҳини ҳам кўтариб келади.
- Агар бошқалар Ислом дини ҳақида ўқишга имкон топа олмасалар, ўзимиз уларга Исломни ҳаётимизда, ахлоқимизда, юриш-туришимизда кўрсатиб беришимиз керак.
- Аллоҳ сени ақлинг билан икром қилди. Сен ўзингни феълинг билан хор қилма!
- Мусҳафларимиз устида чанг тўплангани миқдорича қалбларимизда ғам тўпланади.
- Ким сенга намозни эслатиб насиҳат қилса, ўша сени энг қаттиқ яхши кўрадиган кишидир.
- Анча вақт олдин Аллоҳдан сўраган нарсанг бир кун йўлингдан чиқади, эҳтимол сен унутиб юборгандирсан, лекин Аллоҳ унутмайди.
- Билгинки, Аллоҳ субҳанаҳу ва таоло сендан сен истаётган нарсани тўсаётган бўлса, охиратда Ўзи истаганидек ато қилиши учун захира қилиб шундай қилади. Кўпчилик буни маҳрумлик деб гумон қилишади. Аллоҳ таоло бандасини маҳрум қилишдан покдир!
- Мол ризқнинг бир қисмидир. Соғлик ризқи бор, фарзанд номли ризқ бор, таом деган ризқ бор, барака номли ризқ бор, Аллоҳ субҳанаҳу ва таоло томонидан берилган ҳар бир неъмат ризқдир, ризқ фақат молнинг ўзи эмас.
- Пок ниятлар Аллоҳнинг ҳузурида зое бўлмайди, одамлар ўша ниятлар борасида ҳар қанча ёмон гумон қилсалар ҳам.
- Кун келади юзингда биргина табассум пайдо бўлиши учун ўзини қурбон қиладиган кишини топасан. Шундай экан, қалбинг эшикларини беркитиб олма, чунки ўша эшикларни чертадиганларнинг ҳаммаси ҳам қалбингни жароҳатлашни ният қилавермайди.
- Неъматларга шу даражада ўрганиб қолдикки, биз ҳолимиздан сўралсак, «яхшимас» деймиз. Офиятни, неъматларнинг давомийлигини ҳис қилганмизми?
- Ким айбсиз дўст истаса, ёлғиз яшайди. Ким нуқсонсиз хотин истаса, бўйдоқ ҳолда яшайди. Ким муаммоларсиз ёр истаса, ўшандай ёрни излаб ўтади. Ким комил қариндош истаса, силаи раҳмни узган ҳолда яшайди.
- Ҳар қандай нарса ишлатилмай, ташлаб қўйилса, эскиради. Илло Қуръон ундоқ эмас. Агар уни ташлаб қўйсанг, ўзинг эскирасан.
- Агар ҳақ билан ҳақ ўртасидаги курашни кўрсанг, бундай курашнинг топилиши асло мумкин эмас. Чунки, ҳақ биттадир! Ҳақ билан ботил ўртасидаги кураш узоққа чўзилмайди! Чунки, ботил доим йўқ бўлувчи, енгилувчидир
- Одамларнинг тадбирларидан хавотирга тушма! Уларнинг қўлларидан келадиган энг охирги иш Аллоҳнинг иродасини амалга оширишдир.
Нозимжон Ҳошимжон тайёрлади
© islom.uz 2003-2024.
Барча ҳуқуқлар ҳимояланган. Сайтдан маълумот олинганда манба кўрсатилиши шарт.
Email: admin@islom.uz
Telegram: @portalislomuzadmin_bot
Ўзбекистон, Тошкент, 100185
Сўгалли ота кўчаси, 5-уй
