Рамазон ҳайитингиз муборак бўлсин!
Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.
Бугун эрта тонгдан юртимизнинг барча масжидлари қатори «Шайх Муҳаммад Содиқ Муҳаммад Юсуф» жоме масжидида ҳам Рамазон ҳайити муносабати билан байрам намози ўқилди. Унда минглаб ҳамюртларимиз иштирок этишди.
Намоз аввалида имом домлаларимиз Рамазон ойи ва тутган рўзаларимизнинг фазилатлари ҳақида амру-маъруфлар қилиниб, Рамазон ҳайити байрамини муносиб нишонлаш, бу кунни яхши кайфиятда ўтказиш, барча кин-адоватларни унутиш лозимлиги таъкидланди ҳамда эл-юрт ҳаққига дуолар қилинди.
Шундан сўнг Ҳайит намози жамоат ила адо этилиб, халқимиз, юртимиз ҳаққига эзгу дуолар қилиниб, байрам билан барча юртдошларимиз қутланди.
Қайд этиш жоизки, масжидда намозхонларга қулайлик яратиш мақсадида барча зарур ишлар амалга оширилди. Масжидларга туташ кўчалар вақтинча ёпилиб, намозхонлар учун жой ажратилди. Ички ишлар, соғлиқни сақлаш ва бошқа мутасадди идоралар вакиллари навбатчилиги ташкил этилди ҳамда карантин қоидаларига мувофиқ Рамазон ҳайити намози ўқилди.
Бугунги файзли тароватли кунларда барча юртдошларимизни, бутун мусулмонларни Рамазон ҳайити билан муборакбод этамиз.
Рамазон ҳайитингиз қутлуғ бўлсин!
© islom.uz 2003-2026.
Барча ҳуқуқлар ҳимояланган. Сайтдан маълумот олинганда манба кўрсатилиши шарт.
Email: admin@islom.uz
Telegram: @portalislomuzadmin_bot
Ўзбекистон, Тошкент, 100185
Сўгалли ота кўчаси, 5-уй
