Аллоҳ таолонинг валий бандаларидан бўлишимизга сабаб бўлувчи 10 та амал
Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.
(биринчи мақола)
Аллоҳ азза ва жалланинг муҳаббатига эришишга сабаб бўладиган амаллар кўп. Ибн Қаййим раҳимаҳуллоҳ «Мадорижус соликийн» китобларида қуйидаги амалларни зикр қилганлар.
Биринчи амал
Қуръони Каримни, унинг маъноларини тадаббур, тафаккур қилиб қироат қилиш. Чунки, барча азизлик ундадир.
Аллоҳ таоло Қуръони Каримда шундай деб марҳамат қилган:
كِتَابٌ أَنزَلْنَاهُ إِلَيْكَ مُبَارَكٌ لِّيَدَّبَّرُوا آيَاتِهِ وَلِيَتَذَكَّرَ أُوْلُوا الْأَلْبَابِ
«Биз сенга нозил қилган Китоб муборакдир. Ақл эгалари унинг оятларини тадаббур қилишлари ва эслашлари учундир» (Сод сураси, 29-оят).
Қуръонни, ундаги сураларни яхши кўриш орқали Аллоҳ таолонинг муҳаббатига сазовор бўлинади.
Оиша розияллоҳу анҳодан ривоят қилинади:
Расулуллоҳ соллаллоҳу алайҳи васаллам бир одамни аскарларга бошлиқ қилиб ҳарбий юришга жўнатди. У лашкарга имом бўлиб намоз ўқиб берарди ва ҳар ракатни «Ихлос» сураси билан тугатар эди.
Юришдан қайтишгач, имомнинг бу ишини Пайғамбаримиз соллаллоҳу алайҳи васалламга айтиб беришди. Расулуллоҳ соллаллоҳу алайҳи васаллам: «Ундан сўрангларчи, нега шундай қиларкин?» - дедилар. Саҳобалар ҳалиги бошлиқдан сўрашди. У: «Чунки Ихлос сураси бу Аллоҳнинг сифатидир. Мен уни ўқишни яхши кўраман» - деди. Расулуллоҳ соллаллоҳу алайҳи васаллам: «Унга етказиб қўйинглар, Аллоҳ азза ва жалла ҳам уни яхши кўради», дедилар.
Имом Бухорий ва Муслим ривоят қилишган.
Аллоҳ таоло бизни яхши кўришини истасак, Қуръони Каримни севиб, ихлос билан тиловат қилайлик!
Нозимжон Ҳошимжон тайёрлади
© islom.uz 2003-2025.
Барча ҳуқуқлар ҳимояланган. Сайтдан маълумот олинганда манба кўрсатилиши шарт.
Email: admin@islom.uz
Telegram: @portalislomuzadmin_bot
Ўзбекистон, Тошкент, 100185
Сўгалли ота кўчаси, 5-уй
